بدھ14؍شوال المکرم 1442ھ26؍مئی 2021ء

پاک انگلینڈ سیریز برابر ہونے پر بابر اعظم اور شاداب خان کا دلچسپ ردِ عمل

قومی کرکٹ ٹیم کے کپتان بابر اعظم نے کراچی میں ہونے والی پاک انگلینڈ سیریز کے برابر ہونے کے بعد شہر لاہور پر نظریں جمالی ہیں۔

بابر اعظم نے اپنے ٹوئٹر اکاؤنٹ پر قومی ٹیم کی جانب سے جیت کی خوشی منانے کی دو تصویریں ٹوئٹ کی ہیں۔

انہوں نے اپنے ٹوئٹ میں لکھا ہے کہ کراچی ناقابل یقین تھا، لاہور اب آپ کے پاس آ رہے ہیں۔

دوسری جانب قومی ٹیم (ٹی ٹوئنٹی فارمیٹ) کے نائب کپتان شاداب خان کا میچ سے متعلق ٹوئٹ میں کہنا تھا کہ باہر بیٹھ کر میچ دیکھنا زیادہ مشکل ہے، میرا دل بند ہو جانا تھا آج، کیا کمال کا میچ تھا؟

انہوں نے مزید لکھا کہ آصف علی کے چھکے، حسنین کا نیا بول اسپن، افتخار احمد بھائی کی آف اسپن، محمد نواز کا جِگرا، محمد وسیم جونیئر کا عزم اور حارث رؤف سے تو پیار ہو گیا، مکمل ٹیم کی کوشش تھی، پاکستان زندہ باد۔

قومی کرکٹ ٹیم کے کپتان بابر اعظم کے والد کی جانب سے پاک انگلیڈ سیریز کے برابر ہونے پر سوشل میڈیا پر پیغام جاری کیا گیا ہے۔

واضح رہے کہ گزشتہ روز پاک انگلینڈ سیریز کے سلسلے میں ہونے والے چوتھے ٹی ٹوئنٹی میچ کے دوران حارث رؤف کی بولنگ تباہ کن رہی۔

پاکستان نے اعصاب شکن مقابلے کے بعد انگلینڈ کو 3 رنز سے شکست دے کر سیریز 2-2 سے برابر کردی۔

پاکستان کی جانب سے دیے گئے 167 رنز کے ہدف کے تعاقب میں انگلینڈ کی ٹیم 163 رنز پر آل آؤٹ ہوگئی تھی۔

بشکریہ جنگ
You might also like

Comments are closed.