پاکستان نے T20 سیریز جیت کر تاریخ رقم کردی: بابر اعظم

ون ڈے کرکٹ کے نمبر ون بلے باز اور قومی کرکٹ ٹیم کے کپتان بابر اعظم نے کہا ہے کہ پاکستان نے جنوبی افریقہ کے خلاف ٹی ٹوئنٹی سیریز جیت کر تاریخ رقم کردی۔

بابر اعظم نے جنوبی افریقہ کے خلاف ٹی ٹوئنٹی سیریز جیتنے کے بعد اپنے تصدیق شدہ ٹوئٹر اکاؤنٹ پر میچ کے چند حسین اور یادگار لمحات کی تصویریں شیئر کیں۔

کپتان بابر اعظم نے تصویریں شیئر کرتے ہوئے اپنے ٹوئٹ میں لکھا کہ ’الحمداللّہ! سیریز جیت کر پاکستان نے تاریخ رقم کردی۔‘

پاکستان کرکٹ ٹیم کے سابق فاسٹ بالر اور تجزیہ کار شعیب اختر نے گزشتہ روز کھیلے گئے پاکستان اور جنوبی افریقہ کے آخری ٹی ٹوئنٹی میچ پر تبصرہ کرتے ہوئے کہا ہے کہ مڈل آرڈر میں جو تھوڑی گڑبڑ دیکھنے میں آئی اس کی وجہ سے پاکستان کے لیے میچ مشکل ہوا۔

اُنہوں نے لکھا کہ ’جادو اس وقت ہوتا ہے جب آپ ہار ماننے سے انکار کرتے ہیں۔‘

بابر اعظم نے شاندار پرفارمنس پر فخر زمان، محمد رضوان اور فہیم اشرف سمیت پوری ٹیم کی تعریف کی۔

کپتان بابر اعظم نے مزید کہا کہ ’چیمپیئنز! مجھے آپ پر فخر ہے۔‘

قومی کرکٹ ٹیم کے کپتان اور آئی سی سی ون ڈے انٹرنیشنل پلیئرز رینکنگ میں پہلے نمبر پر موجود بیٹسمین بابراعظم نے کہا ہے کہ اُن کا اگلا ہدف اپنی اس درجہ بندی کو برقرار رکھنا ہے۔

خیال رہے کہ پاکستان نے چوتھے ٹی ٹوئنٹی میں جنوبی افریقہ کو دلچسپ مقابلے کے بعد 3 وکٹ سے ہرادیا اور سیریز 3-1 سے اپنے نام کرلی۔

ایک موقع پر ایسا دکھائی دے رہا تھا کہ میچ گرین شرٹس کے ہاتھ سے نکل جائے گا لیکن گرین شرٹس نے جنوبی افریقہ کا 145 رنز کا ہدف 7وکٹ کے نقصان پر ایک گیند پہلے ہی پورا کرلیا تھا۔

پاکستان اور جنوبی افریقہ کے آخری میچ میں فخر زمان نے 60 رنز کی برق رفتار اننگز کھیلی۔

بشکریہ جنگ