پاکستان میں سلو پچز پر سابق آسٹریلوی کرکٹرز کی تنقید

آسٹریلیا کے سابق ٹیسٹ کرکٹرز نے پاکستان میں سلو پچز پر تنقید کرتے ہوئے کہا ہے کہ یہ ٹیسٹ کرکٹ کی بقاء کے لیے اچھی پلاننگ نہیں، ٹیسٹ کرکٹ کو دلچسپ بنانے کے لیے پاکستان کو پچز کو بہتر بنانا ہوگا۔

آسٹریلیا کے سابق کھلاڑی مارک وا نے سلو پچز پر تنقید کرتے ہوئے کہا کہ لاہور ٹیسٹ کی پچ بہت ہی معمولی سی ہے،مجھے ایسی پِچز نہیں پسند جہاں فاسٹ بولرز باؤنسرز نہ کرسکیں۔

مارک وا کا کہنا تھا کہ چاہتا ہوں پاکستان میں باؤنسی اور فاسٹ بولرز کے لیے سازگار پچز بنائی جائیں،سلو پِچز ٹیسٹ کرکٹ کی بقا کے لیے اچھی پلاننگ نہیں۔

دوسری جانب آسٹریلیا کے سابق ٹیسٹ وکٹ کیپر براڈ ہاڈن نے کہا کہ دورۂ پاکستان پر فیصلہ کن پِچز نہیں بنائی گئیں، سلو پچز نے شاہین شاہ آفریدی جیسے باصلاحیت بولرز کو غیرموثر بنا دیا ہے۔

براڈ ہاڈن کا مزید کہنا تھا کہ پاکستان کی طاقت فاسٹ بولنگ میں ہے،ٹیسٹ کرکٹ کو دلچسپ بنانے کے لیے پاکستان کو پچز کو بہتر بنانا ہوگا۔

بشکریہ جنگ