پاکستان علماء کونسل کی اپیل پر آج ملک بھر میں یوم یکجہتیٔ فلسطین منایا جا رہا ہے

پاکستان علماء کونسل کی اپیل پر ملک بھر میں یوم یک جہتی فلسطین منایا جا رہا ہے۔

مساجد میں خطباتِ جمعہ میں بھی مظلوم فلسطینیوں کے ساتھ یک جہتی کا اظہار کیا گیا اور خصوصی دعائیں مانگی گئیں۔

چیئرمین پاکستان علماء کونسل حافظ طاہر محمود اشرفی نے خطبۂ جمعہ میں کہا ہے کہ فلسطین کے معاملے پر اب فیصلہ کن مرحلہ آ گیا ہے، امتِ مسلمہ مظلوم فلسطینی عوام کے ساتھ ہے، مسلم حکمرانوں کو فوری طور پر اپنا کردار ادا کرنا ہو گا۔

اُنہوں نے تشویش کا اظہار کرتے ہوئے کہا کہ انسانی حقوق کی بات کرنے والے مظلوم فلسطینیوں کے قتلِ عام پر خاموش ہیں۔

حافظ طاہر محمود اشرفی نے مزید کہا کہ سعودی عرب کو بطور او آئی سی سربراہ مسئلہ فلسطین و کشمیر کے لیے بھرپور کردار ادا کرنا ہو گا۔

اُنہوں نے یہ بھی بتایا کہ 18 اکتوبر کو اسلام آباد میں یک جہتیٔ فلسطین کانفرنس ہو گی۔

بشکریہ جنگ