ٹی 20 بلاسٹ میں محمد رضوان کی شاندار واپسی
قومی کرکٹ ٹیم کے وکٹ کیپر بیٹر محمد رضوان کی ٹی ٹوئنٹی بلاسٹ میں شاندار واپسی ہوئی ہے۔
نیشنل ڈیوٹی سے واپسی کے بعد رضوان نے پہلے ہی میچ میں نصف سنچری بنا ڈالی، ٹیم سسکس کی جانب سے کھیلتے ہوئے محمد رضوان نے 32 گیندوں پر 66 رنز بنائے، ان کی اننگز میں 5 چوکے اور 5 چھکے شامل تھے۔
خیال رہے کہ محمد رضوان ٹی ٹوئنٹی بلاسٹ کی 4 اننگز میں 3 ففٹیاں اسکور کرچکے ہیں۔
دوسر جانب پاکستانی فاسٹ بولر محمد عامر نے ٹی ٹوئنٹی بلاسٹ کے لیے انگلش کاؤنٹی گلوسسٹرشائر سے معاہدہ کرلیا ہے، انہیں ہم وطن نسیم شاہ کی جگہ اسکواڈ میں شامل کیا گیا ہے۔
گلوسسٹرشائر کاؤنٹی کے اعلامیے کے مطابق پاکستانی فاسٹ بولر محمد عامر ٹی ٹوئنٹی بلاسٹ کے بقیہ میچز کے لیے کاؤنٹی کو دستیاب ہوں گے۔
خیال رہے کہ نسیم شاہ اس سے قبل کاؤنٹی ٹیم کا حصہ تھے، وہ فیملی مصروفیات کی وجہ سے پاکستان آئے جس کے بعد انہیں قومی کیمپ میں طلب کرلیا گیا تھا اور پھر وہ کاؤنٹی ٹیم کو دوبارہ جوائن نہیں کرسکتے تھے۔
محمد عامر تین سال بعد ٹی ٹوئنٹی بلاسٹ میں ایکشن میں ہوں گے، آخری مرتبہ انہوں نے 2019 میں کاؤنٹی ٹیم ایسیکس کی نمائندگی کی تھی۔
Comments are closed.