نواز شریف کی جعلی ویکسینیشن انٹری، FIA اور پولیس کے مقدمات درج

سابق وزیرِ اعظم میاں نواز شریف کی جعلی ویکسی نیشن انٹری پر ایف آئی اے اور پولیس نے الگ الگ مقدمات درج کر لیے۔

لاہور میں کورونا ویکسین کے جعلی سرٹیفکیٹس بنانے کا سلسلہ تھم نہ سکا، کوٹ خواجہ سعید اسپتال میں سابق وزیر اعظم نواز شریف کے شناختی کارڈ پر کورونا ویکسین کی جعلی انٹری سامنے آگئی، نواز شریف کے نام پر دوسری ڈوز کا میسج بھی جاری ہوگیا، وزیراعلیٰ پنجاب عثمان بزدار نے محکمہ صحت سے 48 گھنٹے میں رپورٹ طلب کر لی۔

وفاقی تحقیقاتی ادارے (ایف آئی اے) سائبر کرائم نے 2 ملزمان کے خلاف مقدمہ درج کیا ہے۔

ایف آئی اے سائبر کرائم کے درج کیئے گئے مقدمے کے مطابق ملزمان ابوالحسن اور عادل نے جعلی انٹری کے لیے نوید کی آئی ڈی استعمال کی۔

اسد عمر نے کہا کہ نواز شریف کی جعلی ویکسینیشن کے معاملے پر تعجب نہیں ہوا کیونکہ ان کی زیادہ تر روایت جعلی کاموں کی رہی ہے۔

ادھر پولیس نے 3 ملزمان کے خلاف مقدمات درج کر کے ابوالحسن اور عادل کو گرفتار کر لیا ہے۔

بشکریہ جنگ