’نواز، افغان مشیر ملاقات عرب ملک نے کرائی‘

معروف انگریزی اخبار دی نیوز کا کہنا ہے کہ سابق وزیرِ اعظم اور مسلم لیگ نون کے قائد میاں نواز شریف کی افغان مشیر برائے قومی سلامتی حمد اللّٰہ محب اور افغان وزیرِ مملکت سید سعادت نادری سے ملاقات عرب ملک نے کرائی ہے۔

ذرائع کا کہنا ہے کہ نواز شریف اور مشیرِ افغان قومی سلامتی حمد اللّٰہ محب کی ملاقات مشرقِ وسطیٰ کے مسلمان ملک نے کرائی ہے۔

افغان قومی سلامتی کونسل کا کہنا ہے کہ لندن میں مقیم مسلم لیگ نون کے قائد اور سابق وزیرِ اعظم میاں نواز شریف سے افغان مشیرِ قومی سلامتی اور افغان وزیرِ مملکت نے ملاقات کی ہے۔

دی نیوز کے ذرائع نے بتایا ہے کہ ملاقات کی منصوبہ بندی افغان وفد کے لندن دورے سے قبل کر لی گئی تھی، عرب ملک کے سفارت کار نے نواز شریف کو افغان مشیر سے ملاقات کا مشورہ دیا تھا۔

شریف خاندان کے ذرائع کا کہنا ہے کہ نواز شریف نے افغان وفد سے ملاقات ان کی خواہش پر کی۔

وزیرِاعظم عمران خان کے معاونِ خصوصی شہباز گل نے کہا ہے کہ تازہ ڈیولپمنٹ نواز شریف کی ریاستِ پاکستان کو گندی گالی دینے والے سے ملاقات ہے۔

ذرائع نے بتایا ہے کہ نواز شریف نے کابل حکومت کو پاکستانی عوام کی جانب سے پر امن تعلقات کی خواہش کا پیغام پہنچایا۔

نواز شریف نے کہا کہ پاکستان کے عوام پر امن، مستحکم اور خوش حال افغانستان کے خواہاں ہیں۔

وفاقی وزیرِ اطلاعات و نشریات فواد چوہدری کا کہنا ہے کہ بھارتی وزیرِ اعظم نریندر مودی، افغان مشیر حمد اللّٰہ محب یا امر اللّٰہ صالح سمیت ہر پاکستان دشمن نواز شریف کا قریبی دوست ہے۔

ذرائع کا کہنا ہے کہ افغان وفد نے نواز شریف کا شکریہ ادا کیا۔

دی نیوز ذرائع کا کہنا ہے کہ نواز شریف کی جانب سے افغان وفد سے ملاقات پر کوئی تبصرہ نہیں کیا گیا۔

وفاقی وزیرِ داخلہ شیخ رشید احمد نے سابق وزیرِ اعظم میاں نواز شریف کو فوج اور رینجرز کی سیکیورٹی دینے کی پیشکش کر دی، ساتھ ہی انہوں نے آزاد کشمیر الیکشن میں کامیابی کا دعویٰ بھی کر دیا۔

ذرائع کا یہ بھی کہنا ہے کہ جس عرب ملک نے ملاقات کرائی اس کے پاکستان سے دیرینہ تعلقات ہیں۔

بشکریہ جنگ