ناپا کو متبادل جگہ دینے پر سندھ حکومت سے رپورٹ طلب

سپریم کورٹ آف پاکستان نے سندھ حکومت سے 1 ماہ میں ناپا کو متبادل جگہ دینے سے متعلق رپورٹ طلب کر لی۔

سپریم کورٹ آف پاکستان کراچی رجسٹری میں سندھ میں زمینوں کا ریکارڈ کمپیوٹرائزڈ کرنے سے متعلق کیس کی سماعت کے دوران چیف جسٹس پاکستان گلزار احمد نے بورڈ آف ریونیو کے سینئر ممبر پر اظہارِ برہمی کرتے ہوئے کہا ہے کہ آدھے کراچی پر قبضہ ہے، سندھ کی آدھی سے زیادہ زمینوں پر قبضے ہیں، کونوں سے تصاویر لے کر آ گئے اور کہانیاں سنا رہے ہیں۔

ہندو جیم خانے کی عمارت خالی کرانے کے کیس کی سماعت سپریم کورٹ آف پاکستان کراچی رجسٹری میں چیف جسٹس پاکستان گلزار احمد کی سربراہی میں 3 رکنی بینچ نے کی۔

ہندو جیم خانے کی عمارت خالی کرانے کے کیس میں کمشنر کراچی اور ایڈووکیٹ جنرل نے عدالتِ عظمیٰ کو بتایا کہ ناپا کے لیے شہر کے مرکز میں کوئی مناسب جگہ نہیں ملی۔

چیف جسٹس پاکستان نے ڈینسو ہال کی تاریخی عمارت پر تعمیرات کا بھی نوٹس لے لیا۔

سیکریٹری کلچر کی سرزنش کرتے ہوئے چیف جسٹس گلزار احمد نے ریمارکس دیئے کہ تاریخی عمارت پر 2 فلور کیسے بن گئے؟

عدالتِ عظمیٰ نے غیر قانونی تعمیرات گرا کر ثقافتی عمارت بحال کرانے کا حکم دے دیا۔

بشکریہ جنگ