مہنگائی کا سلسلہ جاری، ایک ہفتے میں 23 اشیاء کی قیمتیں بڑھ گئیں

ملک میں رواں ہفتے بھی مہنگائی بڑھ گئی، اداہ شماریات نے اعداد و شمار جاری کردیے۔

ایک ہفتے کے دوران ایل پی جی، جلانے والی لکڑی، چینی، دالیں، ٹماٹر، انڈے، گوشت، تازہ دودھ اور دہی سمیت 23 اشیاء کی قیمتوں میں اضافہ ہوا ہے۔

ادارہ شماریات کے مطابق ملک میں مہنگائی کی مجموعی شرح 19 اعشاریہ 83 فیصد رہی، سب سے کم آمدن افراد کے لیے مہنگائی کی شرح 21اعشاریہ 92 فیصد رہی۔

اعداد و شمار کے مطابق ہفتے کے دوران مہنگائی میں صفر اعشاریہ 40 فیصد اضافہ ہوا ہے، اس دوران 23 اشیا ء کی قیمتیں بڑھی ہیں۔

رپورٹ کے مطابق ایل پی کے گھریلو سلنڈر کی قیمت 118 روپے 3 پیسے اضافے کے بعد 2 ہزار 463 روپے سے زائد ہو گئی ہے۔

حالیہ ہفتے میں چینی کی فی کلو اوسط قیمت میں ایک روپے 32 پیسے اضافہ ہو گیا، بیف 2 روپے، مٹن 6 روپے 23 پیسے جبکہ ٹماٹر 5 روپے 42 پیسے فی کلو مہنگا ہوا ہے۔

رواں ہفتے دال مسور 3 روپے 47 پیسے، دال مونگ 12 پیسے، دال ماش 35 پیسے، دال چنا 50 پیسے فی کلو مہنگی ہوئی۔

آگ جلانے والی لکڑی کی فی من قیمت 3 روپے 43 پیسے اضافے کے بعد 788 روپے 13 پیسے ہو گئی۔

ایک ہفتے کے دوران چکن، لہسن، کیلے، تازہ دودھ، دہی کی قیمتوں میں بھی اضافہ ہوا۔

رپورٹ کے مطابق ایک ہفتے کے دوران 5 اشیاء ضروریہ کی قیمتوں میں کمی آئی، آلو 2 روپے 45 پیسے، پیاز ایک روپے 6 پیسے فی کلو سستا ہوگیا، گندم، گڑ، سرخ مرچ کی قیمت میں بھی کمی آئی۔

ادارہ شماریات کے مطابق حالیہ ہفتے 23 اشیاء کی قیمتوں میں استحکام رہا۔

بشکریہ جنگ