مون سون بارشیں معمول سے زیادہ ہونے کا امکان ہے، شیری رحمٰن

وفاقی وزیر موسمیاتی تبدیلی شیری رحمٰن نے کہا ہے کہ سیلاب اور مون سون بارشوں سے لوگوں کی معاشی زندگیوں کو خطرہ ہوتا ہے، ملک کے بیشتر حصوں میں مون سون بارشیں معمول سے زیادہ ہونے کا امکان ہے۔

سماجی رابطے سائٹ ٹوئٹر پر جاری کیے گئے بیان میں وفاقی وزیر موسمیاتی تبدیلی شیری رحمٰن نے مون سون بارشوں اور گلیشیئر پگھلنے سے متعلق قومی اور صوبائی ڈیزاسٹر مینجمنٹ حکام کو احتیاطی تدابیر اختیار کرنے کی ہدایت کردی ہے۔

انہوں نے کہا کہ جنوب مغربی خیبرپختونخوا اور شمال مشرقی بلوچستان میں اضافی مون سون بارشوں کا امکان ہے جبکہ جنوب مغربی پنجاب میں بھی اضافی مون سون بارشوں کا امکان ہے۔

شیری رحمٰن کا یہ بھی کہنا تھا کہ زیادہ مون سون بارشوں کے باعث کوہ سلیمان کے حصوں میں سیلاب کا خطرہ ہے، جنوبی اور مشرقی سندھ میں کم بارشوں سے تھرپارکر، عمر کوٹ میں خشک سالی ہوسکتی ہے۔

ان کا کہنا تھا کہ درجہ حرارت میں اضافے کے باعث جی بی اور شمالی خیبرپختونخوا میں برف کے زیادہ پگھلاؤ کا امکان ہے، شمالی علاقاجات میں برف کے اضافی پگھلاؤ سے سیلاب کا خطرہ ہے، سیلاب کے خطرے سے لاحق علاقوں میں رہائشیوں کے انخلاء کے لیے اقدامات کیے جائیں۔

بشکریہ جنگ