مونس الہٰی FIA کے دفتر پہنچ گئے

اسپیکر پنجاب اسمبلی چوہدری پرویز الہٰی کے صاحبزادے، مسلم لیگ ق کے مرکزی رہنما چوہدری مونس الہٰی ایف آئی اے کے دفتر پہنچ گئے۔

سابق وفاقی وزیر مونس الہٰی اپنے خلاف درج منی لانڈرنگ کے مقدمے میں ایف آئی اے میں پیش ہوئے ہیں۔

مونس الہٰی کے خلاف گزشتہ روز مقدمہ درج کیا گیا تھا، جس پر وہ اپنی گرفتاری دینے کے لیے گزشتہ روز بھی ایف آئی اے کے دفتر آئے تھے۔

ترجمان ایف آئی اے کا کہنا ہے کہ ملزمان مخدوم عمر شہریار اور طارق جاوید کی گرفتاری کے لیے چھاپے مارےجا رہے ہیں۔

اس موقع پر میڈیا سے گفتگو کرتے ہوئے مونس الہٰی نے کہا تھا کہ رانا صاحب جو کر سکتے ہیں کر لیں، میں اب آگیا ہوں، میں خود ایف آئی اے کے دفتر پہنچا ہوں گرفتار کرنا ہے تو کر لیں۔

اس حوالے سے گزشتہ روز وفاقی تحقیقاتی ادارے (ایف آئی اے) کے ترجمان کی جانب سے کہا گیا تھا کہ مونس الہٰی کی گرفتاری کے لیے چھاپے مارے جا رہے ہیں۔

ترجمان ایف آئی اے کا کہنا تھا کہ مونس الہٰی اور دیگر کے خلاف منی لانڈرنگ کا مقدمہ درج کر لیا گیا ہے، جبکہ شریک ملزمان مظہر عباس اور محمد نواز بھٹی کو گرفتار کرلیا گیا ہے۔

رہنما (ق) لیگ نے کہا کہ انھوں نے مجھے گرفتار کرنے کے لیے ٹیمیں تیار کی ہیں، میری اطلاع کے مطابق انھوں نے مجھ پر شوگر کمیشن کا کیس بنایا۔

ایف آئی اے کے ترجمان کے مطابق ملزمان مخدوم عمر شہریار،طارق جاوید، واجد احمد بھٹی اور محمد خان بھٹی کی گرفتاری کے لیے بھی چھاپے مارے جا رہے ہیں۔

ترجمان ایف آئی اے کا یہ بھی کہنا تھا کہ ملزمان پر 72 کروڑ روپے کی منی لانڈرنگ کا الزام ہے، مونس الہٰی سمیت ملزمان کے خلاف کارروائی کا آغاز 2 سال قبل ہوا تھا، مونس الہٰی کے خلاف شوگر کمیشن نے منی لانڈرنگ کا انکشاف کیا تھا۔

بشکریہ جنگ