معروف مذہبی شخصیت آیت اللہ العظمیٰ علامہ محمد حسین نجفی انتقال کرگئے

پاکستان کی معروف و مذہبی شخصیت آیت اللہ العظمیٰ علامہ محمد حسین نجفی انتقال کرگئے۔ مرحوم کی نماز جنازہ آج شام 6 بجے مدرسہ سلطان المدارس سرگودھا میں ادا کی جائے گی۔

اہل خانہ نے ان کی موت کی تصدیق کرتے ہوئے بتایا کہ آیت اللہ العظمیٰ علامہ محمد حسین نجفی کا انتقال ضعیف العمر اور بیمار ہونے کے باعث اسلام آباد کے اسپتال میں ہوا۔

اہل خانہ کے مطابق ان کی میت اسلام آباد سے سرگودھا ان کے آبائی گاؤں چک 40 شمالی لائی جائے گی۔

واضح رہے کہ علامہ محمد حسین نجفی 1932 میں پاکستان میں پیدا ہوئے اور وہ محمد حسین ڈھکو کے نام سے مشہور تھے۔ وہ متعدد کتابوں کے مصنف بھی تھے جن میں اثبات الامامۃ، تفسیر فیضان الرحمن، مسائل الشریعہ اردو ترجمہ وسائل الشیعہ، شرح اردو اعتقادات شیخ صدوق شامل ہیں۔

علامہ محمد حسین نجفی نے مدرسہ سلطان المدارس الاسلامیہ اور جامعہ علمیہ عقیلہ بنی ہاشم کی بنیادیں رکھیں۔

بشکریہ جنگ