لیونل میسی اہل خانہ کے ہمراہ چھٹیاں منانے سعودی عرب پہنچ گئے

حال ہی میں ارجنٹائن کو فٹ بال ورلڈ کپ جتوانے والے اسٹار فٹبالر لیونل میسی گزشتہ روز اہل خانہ کے ہمراہ چھٹیاں منانے سعودی عرب پہنچ گئے۔

غیر ملکی میڈیا رپورٹس کے مطابق لیونل میسی اور ان کے اہل خانہ نے اپنی چھٹی کا پہلا دن شہر کی مصروف زندگی سے دور فارم ہاؤس میں قدرتی مناظر سے قریب تر گزارا۔

وہاں وہ اپنی اہلیہ اور بچوں کے ہمراہ زیادہ تر وقت کھجور کے درختوں کے سائے میں اور عربی ہرنوں کے ساتھ کھیل کر اور انہیں کھانا کھلا کر لطف اندوز ہوئے۔

خیال رہے کہ میسی نے گزشتہ سال مئی میں بھی سعودی عرب کا دورہ کیا تھا، اس دورے میں اسٹار فٹبالر نے دوستوں کے ہمراہ جدہ کے ایک سالانہ تہوار میں شرکت کی تھی۔

دوسری جانب سعودی وزیر سیاحت احمد الخطیب اور ان کے مداحوں نے اسٹار فٹبالر اور اہل خانہ کو سعودی عرب میں والہانہ خوش آمدید کہا۔

مائیکرو بلاگنگ سائٹ ٹوئٹر پر ٹوئٹ کرتے ہوئے سعودی وزیر سیاحت نے کہا کہ ’مجھے سعودی عرب کے سیاحتی سفیر لیونل میسی اور ان کے اہل خانہ کو خوش آمدید کہتے ہوئے خوشی ہو رہی ہے‘۔

انہوں نے ارجنٹائن کے اسٹار فٹبالر لیونل میسی اور اہل خانہ کی چند تصاویر بھی شیئر کیں۔

بشکریہ جنگ