لاہور ہائیکورٹ کا مارکیٹیں رات 10بجے بند کرنے کا حکم

لاہور ہائی کورٹ نے اسموگ میں کمی کے لیے لاہور کی مارکیٹس کو رات 10 بجے بند کرنے کا حکم دے دیا، ریسٹورنٹس ہفتے میں 4 دن رات 10 بجے جبکہ 3 دن 11 بجے بند ہوں گے۔

لاہور ہائی کورٹ کے جسٹس شاہد کریم نے اسموگ میں کمی کے لیے درخواستوں پر سماعت کی۔

عدالت نے ہدایت کی کہ لاہور کی تمام مارکیٹس رات 10 بجے تک بند کر دی جائیں تاہم اتوار کے دن مارکیٹس کھلی رہیں گی۔

عدالت نے ہدایت کی کہ تمام ریسٹورنٹس ہفتے کے 4 دن رات 10 بجے بند ہونے چاہئیں۔

عدالت نے جمعہ، ہفتہ اور اتوار کے 3 دن تمام ریسٹورنٹس رات 11 بجے بند کرنے کا حکم دیا۔

لاہور میں اسموگ کے باعث اسکولوں کی ہفتے میں تین دن چھٹیوں کا اعلان کر دیا گیا۔

عدالت نے یہ حکم بھی دیا کہ جو اسکول جمعے کے دن بند نہیں ہوتے ان اسکولز کو سیل کر دیا جائے، محکمۂ ایجوکیشن سختی سے احکامات پر عمل درآمد کرائے۔

جسٹس شاہد کریم نے دورانِ سماعت ریمارکس دیے کہ آج صبح آسمان بہت بہتر تھا، اسموگ میں کچھ کمی آئی ہے۔

لاہور ہائی کورٹ میں کیس کی آئندہ سماعت 19 دسمبر کو ہو گی۔

بشکریہ جنگ