لاہور: بارش سے لیسکو کے 100 فیڈر ٹرپ

لاہور میں ہونے والی موسلا دھار بارش سے لیسکو کے 100 سے زائد فیڈر ٹرپ کر گئے، فیڈر ٹرپ ہونے کی وجہ سے شہر کے بیشتر علاقوں میں بجلی معطل ہو گئی۔

لاہور میں پنجاب یونیورسٹی، ٹھوکر نیاز بیگ، ملتان روڈ، بند روڈ، سمن آباد، کوٹ خواجہ سعید، ہربنس پورہ، باغبان پورہ، مصری شاہ اور بادامی باغ میں بجلی معطل ہو گئی۔

لاہور میں صبح سویرے موسلا دھار بارش ہوئی جس سے نشیبی علاقوں میں پانی جمع ہو گیا، اس صورتِ حال کے باعث ٹریفک کی روانی بھی متاثر ہوئی۔

ترجمان لیسکو کے مطاق بارش رکنے کے بعد بجلی کی بحالی کا عمل شروع ہو گا۔

ادھر ایم ڈی واسا زاہد عزیز کا کہنا ہے کہ لاہور میں اب تک 103 ملی میٹر بارش ہو چکی ہے، شہر میں تمام انڈر پاسز کلیئر ہیں۔

ایم ڈی واسا نے یہ بھی بتایا ہے کہ بارش رکنے کے بعد 3 گھنٹے میں پانی نکال دیا جائے گا۔

کراچی میں رات گئے ڈیڑھ گھنٹے تک ہونے والی موسلا دھار بارش کے بعد کراچی کی زیادہ تر سڑکوں پر جمع پانی اتر گیا۔

واضح رہے کہ وزیرِاعلیٰ پنجاب سردار عثمان بزدار نے لاہور کے نشیبی علاقوں میں جمع ہونے والے بارش کے پانی کی جلد نکاسی کا حکم دیا ہے۔

انہوں نے ہدایت کی ہے کہ واسا حکام اور انتظامیہ نکاسیٔ آب کے لیے تمام وسائل بروئے کار لائیں۔

بشکریہ جنگ