لانگ مارچ کیلئے حوصلہ اور ہمت چاہیے، فردوس عاشق اعوان

وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ لانگ مارچ کے لیے حوصلہ اور ہمت چاہیے، کرپشن کے پیسے پر پلنے والوں میں لانگ مارچ کی جرات نہیں۔

فردوس عاشق اعوان نے اپنے بیان میں کہا کہ پی ڈی ایم کی گھٹیا سیاست کا جنازہ اٹھ چکا، غیر فطری اتحاد اپنے عبرتناک انجام کو پہنچ گیا ہے، استعفوں کی سیاست پر پی ڈی ایم کی ہنڈیا بیچ چوراہے میں پھوٹ پڑی۔

اُنہوں نے کہا کہ جن کی رگوں میں کرپشن رچ بس گئی ہو، وہ لانگ مارچ اور استعفے نہیں دے سکتے، جعلی راجکماری کے ابا جی کے ساتھ مسٹر 10پرسنٹ نے جو ہاتھ کیا وہ ن لیگ ساری زندگی یاد رکھے گی۔

پاکستان مسلم لیگ ن کی ترجمان مریم اورنگزیب کا حکومت پر تنقید کرتے ہوئے کہنا ہے کہ سیاسی انتقام لینے سے سیاسی استحکام نہیں آتا۔

فردوس عاشق اعوان نے یہ بھی کہا کہ کل تک ”بہن بھائی“ کا راگ الاپنے والے آج ایک دوسرے کے دست و گریباں ہیں، مولانا ایک بار پھر سندھ کے جعلی شہزادے کے ہاتھوں بری طرح رسوا ہوئے۔

اُن کا کہنا تھا کہ مولانا حلوہ کھانے نکلے تھے لیکن انہیں حلوہ ملا نہ استعفوں کا جلوہ، مولانا کے ساتھ جو کچھ ہوا، اس کے بعد انہیں خلوت میں چلے جانا چاہیے۔

فردوس عاشق اعوان نے مزید کہا کہ کورونا وائرس کی تیسری لہر کے پیش نظر لانگ مارچ یا اجتماعات کرنا عوام دشمنی ہے۔

بشکریہ جنگ