فنی خرابی کا شکار طیارہ کوئٹہ ایئرپورٹ پر گراؤنڈ، پرواز کل اسلام آباد جانے کی امید

کوئٹہ ایئرپورٹ پر فنی خرابی کا شکار ہونے والے قومی ایئرلائنز پی آئی اے کے طیارے کو گراؤنڈ کردیا گیا ہے۔ مسافر گھروں کو چلے گئے جبکہ پرواز کے منگل کی سہ پہر اسلام آباد روانہ ہونے کی امید ظاہر کی گئی ہے۔

پیر کی دوپہر پی آئی اے کی اسلام آباد کےلیے پرواز کا کوئٹہ سے ٹیک آف فنی خرابی کی بنا پر روکا گیا۔

پرواز پی کے 326 پیر کی دوپہر ایک بجے اسلام آباد کےلیے روانہ ہو رہی تھی اور طیارہ رن وے پر 194 کلومیٹر فی گھنٹہ کی رفتار پر گیا تو پائلٹ نے فنی خرابی محسوس کرتے ہوئے اچانک ٹیک آف منسوخ کر دیا۔

ایوی ایشن ذرائع کے مطابق بلوچستان کے صوبائی دارالحکومت کوئٹہ سے قومی ایئرلائن پی آئی اے کی پرواز پی کے 326 نے دوپہر 12 بجکر 20 منٹ پر اسلام آباد کےلیے روانہ ہونا تھا۔

پائلٹ نے ٹریفک کنٹرول کو کاک پٹ میں شیئر ونڈز، تیز ہواؤں اور بریکس گرم ہونے کی نشاندہی کی۔

ایئر بس اے 320 طیارہ بغیر کسی مدد کے اپنی پارکنگ تک پہنچا، بعدازاں انجینئرز نے اس کا معائنہ کیا۔

ایئرپورٹ حکام کے مطابق طیارے کی اگلی پرواز سی اے اے ایئر وردینیس کی جانب سے کلیئرنس سے مشروط ہونے کی وجہ سے پرواز کی روانگی روک دی گئی۔

ایئرپورٹ منیجر ملک مظہر اعوان نے جنگ سے گفتگو کرتے ہوئے بتایا کہ مسافروں کو طیارے سے آف لوڈ کردیا گیا تھا، بعدازاں انہیں گھروں کو روانہ کر دیا گیا۔

ملک مظہر اعوان کے مطابق طیارے کی مکمل فٹنس کےلیے درکار کچھ پرزے منگل کو کوئٹہ پہنچیں گے۔ پرواز پی کے 326 ممکنہ طور پر منگل کی سہ پہر اسلام آباد کےلیے روانہ ہوسکے گی۔

بشکریہ جنگ