عامر لیاقت کا اپنے بچوں کو اہم مشورہ

پاکستان تحریک انصاف کے سابق رہنما ڈاکٹر عامر لیاقت حسین نے بیٹے احمد اور بیٹی دُعا کو اُن کی والدہ سیدہ بشریٰ اقبال کا احترام کرنے کا مشورہ دیا ہے۔

عامر لیاقت حسین نے اپنے تصدیق شدہ انسٹاگرام اکاؤنٹ پر اپنے بیٹے احمد اور بیٹی دُعا کے بچپن کی تصویر شیئر کی جس کے ساتھ ایک طویل کیپشن بھی تحریر کیا۔

اپنی پوسٹ کے کیپشن میں عامر لیاقت حسین نے اپنے دونوں بچوں سے مخاطب ہوتے ہوئے کہا کہ ہمیشہ چاند کی طرح چمکتے رہو اور آپ کے چہرے پر مسکراہٹ کے سوا کچھ نہ ہو، میں نے آپ کو پالنے میں بہت مشکلیں برداشت کیں اور ایک وقت ایسا بھی آیا جب میرے پاس پچاس روپے نہیں تھے لیکن میں نے کام کیا اور آپ کو کسی پریشانی میں نہیں آنے دیا۔ 

عامر لیاقت حسین نے کہا کہ ہمارے رب نے بھی فرمایا ہے کہ اولاد کے لیے اپنے ماں اور باپ دونوں کا ہی درجہ بُلند ہے۔

اُنہوں نے اپنی دلی خواہش کا اظہار کرتے ہوئے کہا کہ میں آپ کو اتنا اونچا دیکھنا چاہتا ہوں کہ جب میں مر جاؤں تو لوگ یہ نہ کہیں کہ عامر لیاقت کا جنازہ جا رہا ہے بلکہ یہ کہنا کہ یہ احمد جو بہت بڑا انجینئر ہے اور دعا جو کہ سب سے بڑی گرافک ڈیزائنر ہے، اُن کے والد کا جنازہ ہے۔

عامر لیاقت نے مزید کہا کہ میرا آپ کو مشورہ ہے کہ اپنی ماں کا ہمیشہ احترام کریں کہ وہ آپ کی ماں ہیں اور رہیں گی۔

آخر میں اُنہوں نے دونوں بچوں کو سلامتی کی دُعا دیتے ہوئے کہا کہ تمہارا بابا مشکلات سے لڑ رہا ہے۔

بشکریہ جنگ