عالمی ادارہ صحت کا پنجاب کیلئے ایمبولینس اور موٹرسائیکلوں کا عطیہ

عالمی ادارہ صحت کی جانب سے صوبہ پنجاب کے لیے8 ایمبولینس گاڑیوں اور 15موٹرسائیکلوں کا عطیہ دیا گیا ہے۔

اس ضمن میں وزیراعلیٰ آفس میں ایمبولینس گاڑیاں اور موٹرسائیکلیں پنجاب حکومت کے سپرد کرنے کی تقریب کا انعقاد کیا گیا۔

وزیراعلیٰ پنجاب عثمان بزدار کو ڈبلیو ایچ او کے کنٹری ہیڈ ڈاکٹر الپتھاماہی پالا نے ایمبولینس گاڑیوں کی چابیاں پیش کیں۔

ایمبولینس گاڑیاں کورونا وائرس کے مریضوں کو اسپتال اور قرنطینہ سینٹرز منتقل کرنے کے لیے استعمال کی جائیں گی جبکہ معمر شہریوں کو کورونا ویکسین لگانے کے لیے بھی ایمبولینس استعمال کی جاسکے گی۔

وہ مریض جو نقاہت کے باعث اسپتال نہیں آسکیں گے ایمبولینس ان کے گھر تک پہنچے گی جبکہ موٹر سائیکل کے ذریعے کورونا ٹیسٹ کے سیمپل لیبارٹری پہنچائے جاسکیں گے۔

ایمبولینس میں آکسیجن، دیگرآلات، ٹیسٹ سیمپل لے جانے کے لیے آئس باکس بھی موجود ہوں گے، لاہور ایئرپورٹ پر کورونا وائرس کے مریضوں کو اسپتال منتقل کرنے کے لیے ایمبولینس موجود ہوگی۔

وزیراعلیٰ پنجاب عثمان بزدار نے کہا ہے کہ وہ شیخوپورہ میں یونیورسٹی بنانے کی منظوری دیتے ہیں۔

واہگہ بارڈر پر سرحدپار سے آنےوالے مریضوں کو ایمبولینس کے ذریعے منتقل کیا جاسکے گا۔

وزیراعلیٰ پنجاب عثمان بزدار نے ایمبولینس گاڑیوں اور موٹرسائیکلوں کا عطیہ کرنے پر ڈبلیو ایچ او کا شکریہ ادا کیا۔

عثمان بزدار نے کہا کہ کورونا وائرس کے خلاف جنگ میں متحد اور یکساں ہوکر کاوشیں کرنا ہوں گی۔

بشکریہ جنگ