ضمنی و بلدیاتی الیکشن سے متعلق اہم فیصلہ آج ہوگا

الیکشن کمیشن نے ضمنی و بلدیاتی انتخابات ملتوی کرنے کی حکومتی درخواست پر سیکرٹری داخلہ، سیکرٹری دفاع اور ڈی جی ملٹری آپریشنز کو آج طلب کرلیا۔

رپورٹس کے مطابق الیکشن کمیشن نے پنجاب، سندھ اور خیبر پختونخوا کے چیف سیکرٹریز اور آئی جیز کو بھی طلب کرلیا ہے، اجلاس میں اہم فیصلہ کرنے کا اعلان ہوگا۔

ذرائع کا کہنا ہے کہ الیکشن کمیشن نے اس معاملے پر کل اجلاس طلب کر لیا، مشاورت کے لیے چیف سیکرٹریز پنجاب، خیبرپختونخوا اور سندھ کو طلب کیا گیا ہے۔

واضح رہے کہ گزشتہ روز بھی چیف الیکشن کمشنر کی زیر صدارت الیکشن کمیشن میں اجلاس ہوا، جس میں ضمنی و بلدیاتی انتخابات ملتوی کرنے سے متعلق وزارت داخلہ کے خط کا جائزہ لیا گیا۔

حکومت نے قومی و پنجاب اسمبلی کی 12 اور کراچی میں بلدیاتی انتخابات ملتوی کرنے کی استدعا کر رکھی ہے۔

بشکریہ جنگ