شی جن پنگ تیسری مدت کیلئے چینی صدر کا عہدہ سنبھالیں گے

چین کے صدر شی جن پنگ کمیونسٹ پارٹی کی مرکزی کمیٹی کے مزید 5 سال کے لیے جنرل سیکریٹری منتخب ہو گئے، وہ تیسری مدت کے لیے چین کے صدر کا عہدہ سنبھالیں گے۔

چینی میڈیا کے مطابق چین کے صدر شی جن پنگ تیسری مدت کے لیے قیادت سنبھالنے والے رہنما بن گئے۔

چینی میڈیا نے بتایا ہے کہ پارٹی ارکان کی بند کمرہ ووٹنگ میں شی جن پنگ کی تقرری ہوئی ہے۔

چینی میڈیا نے یہ بھی بتایا ہے کہ چین کی کمیونسٹ پارٹی کی قیادت میں 25 برس میں پہلی بار کوئی خاتون مکمل رکن نہیں ہوں گی۔

دوسری جانب چین کے صدر شی جن پنگ نے تقرری کے بعد بیجنگ میں صحافیوں سے گفتگو کرتے ہوئے کہا ہے کہ پارٹی اور عوام کے لیے فرائض کی انجام دہی کے لیے تندہی سے کام کریں گے۔

ان کا مزید کہنا ہے کہ چین دنیا کے بغیر ترقی نہیں کر سکتا اور دنیا کو بھی چین کی ضرورت ہے۔

چینی صدر شی جن پنگ کا یہ بھی کہنا ہے کہ چین نے 40 سال کی کوششوں کے بعد تیز اقتصادی ترقی اور طویل مدتی سماجی استحکام پیدا کیا ہے۔

چین کے صدر شی جن پنگ کمیونسٹ پارٹی آف چائنا کے تیسری مدت کے لیے جنرل سیکریٹری منتخب ہو گئے۔

وزیرِ اعظم شہباز شریف نے جاری کیے گئے بیان کے ذریعے چینی صدر شی جن پنگ کو کمیونسٹ پارٹی آف چائنا کے تیسری مدت کے لیے جنرل سیکریٹری منتخب ہونے پر مبارک باد پیش کی ہے۔

انہوں نے کہا ہے کہ صدر شی جن پنگ کا انتخاب چینی عوام کی خدمت کے لیے ان کی دانش مندانہ ذمے داری کو شاندار خراجِ تحسین ہے۔

وزیرِ اعظم شہباز شریف کا یہ بھی کہنا ہے کہ یہ انتخاب چینی صدر شی جن پنگ کی مدبرانہ قیادت کا مظہر ہے، یہ انتخاب چین کے عوام کی پرخلوص خدمت کے غیر متزلزل جذبے کا عکاس ہے۔

بشکریہ جنگ