شہباز شریف ضمانت کیس، ریفری جج کی تقرری کیلئے فائل چیف جسٹس کو بھجوا دی

لاہور ہائیکورٹ نے آمدن سے زائد اثاثہ جات کیس میں مسلم لیگ نون کے صدر شہباز شریف کی درخواست ضمانت  کی فائل چیف جسٹس کو بھجوا دی گئی۔

رجسٹرار لاہور ہائیکورٹ نے ریفری جج کی تقرری کیلئے فائل چیف جسٹس کو بھجوائی۔

مسلم لیگ (ن) کے صدر اور اپوزیشن لیڈر شہباز شریف کی ضمانت کا معاملہ اب ریفری جج کے پاس جائے گا۔

واضح رہے کہ آمدن سے زائد اثاثہ جات کیس میں جسٹس سردار سرفراز ڈوگر نے شہبازشریف کی ضمانت منظور جبکہ جسٹس اسجد جاوید گھرال نے مسترد کردی تھی۔

جسٹس اسجد جاوید گھرال کی جانب سے اختلافی نوٹ سامنے آ نے کے بعد قانونی ماہرین کا کہنا ہے کہ معاملہ چیف جسٹس کو بھیجا جائے گا، اس صورت میں فیصلے کے لیے وہ ریفرل جج مقرر کریں گے۔

مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف کی رہائی عملی طور پر رک گئی، ضمانتی مچلکےجمع نہ ہوسکے۔

دوسری جانب جسٹس اسجد جاوید گھرال نے کہا کہ سماعت کے بعد جب جسٹس سردار سرفراز نے رضامندی طلب کی تو میں نے صاف انکار کیا، جسٹس سرفراز ڈوگر نے اکیلے ہی متفقہ فیصلہ سنا دیا۔

انہوں نے کہا کہ اس بارے میں فوراً ہی چیف جسٹس ہائیکورٹ کو آگاہ کیا، مختصر فیصلہ دستخط کرنے کیلئے بھجوایا گیا جس پر میرے دستخط کرنے کا سوال ہی نہیں اٹھتا۔

بشکریہ جنگ