شاداب خان انجری کا شکار، دعاؤں کی درخواست کردی

پاکستان سُپر لیگ کی ٹیم اسلام آباد یونائیٹڈ کے کپتان شاداب خان انجری کا شکار ہوگئے۔

گزشتہ روز لاہور کے قذافی اسٹیڈیم میں کھیلے گئے کراچی کنگز اور اسلام آباد یونائیٹڈ کے میچ کے دوران اسلام آباد کے دو کھلاڑی انجری کا شکار ہوئے تھے۔

فاتح ٹیم اسلام آباد یونائیٹڈ کے  کپتان شاداب خان اور فاسٹ باؤلر ذیشان ضمیر انجری کا شکار ہوئے۔

شاداب خان کی عدم موجودگی میں کپتانی کے فرائض فاسٹ باؤلر حسن علی نے سرانجام دیے تھے۔

میچ میں فتح کے بعد شاداب خان نے ٹوئٹر پر جاری بیان میں کہا کہ مجھے اپنی ٹیم پر فخر ہے، اپنی انجری کے حوالے سے شاداب خان کا بتانا ہے کہ ابھی اس حوالے سے کچھ کہنا قبل از وقت ہوگا، لہذا میرے لیے اور میری ٹیم کے لیے دعا کریں۔

پاکستان کے ہر دلعزیز کرکٹ کھلاڑی شاداب خان آج اپنی 23 ویں سالگرہ منا رہے ہیں، اُن کی سالگرہ کے موقع پر اُن کے ساتھی کھلاڑیوں کی جانب سے اُنہیں سالگرہ کی مبارکباد دی جا رہی ہے۔

 یاد رہے کہ اسلام آباد یونائیٹڈ اپنا اگلا میچ 17 فروری کو پشاور زلمی کے خلاف کھیلے گی۔

بشکریہ جنگ