سلیمان شہباز کو بےگناہ قرار دینےکی سماعت کا تحریری حکم جاری

لاہور کی اسپیشل کورٹ سینٹرل نے وزیراعظم شہباز شریف کے صاحبزادے سلیمان شہباز کو بے گناہ قرار دینے کی سماعت کا تحریری حکم جاری کر دیا۔

 کیس کے تفتیشی افسر ندیم اختر کی رپورٹ بھی حکم نامے کا حصہ بنائی گئی ہے۔

تفتیشی رپورٹ میں کہا گیا کہ سلیمان شہباز کے کسی پبلک سرونٹ کے بے نامی دار رہنے کے متعلق شہادت نہیں ملی، سلیمان شہباز کے خلاف منی لانڈرنگ کی بھی کوئی شہادت نہیں ملی، ملزم کے خلاف جرم میں ملوث ہونے کی بھی کوئی شہادت نہیں ملی، ان حالات و واقعات کے پیش نظر سلیمان شہباز کو بے گناہ افراد کی فہرست میں رکھا گیا ہے۔

اسپشل کورٹ سینٹرل کے جج فخر بہزاد نے کہا کہ تفتیشی افسر نے اس رپورٹ کی عدالت میں تصدیق کی ہے، تفتیشی افسر بغیر وقت ضائع کیے چالان عدالت میں جمع کروائے۔

حکم نامے میں کہا گیا کہ سلیمان شہباز نے اپنی درخواست ضمانت واپس لینے کی استدعا کی ہے، عدالت درخواست ضمانت واپس لینے کی بنیاد پر نمٹاتی ہے۔

بشکریہ جنگ