سعودی عرب جانے والی تمام ایئرلائنز کو نئی ہدایات جاری

سعودی ایوی ایشن اتھارٹی نے سعودی عرب جانے والی تمام ایئرلائنز کو نئی ہدایات جاری کرتے ہوئے مقرر کردہ حد سے زیادہ سامان لے جانے پر پابندی  عائد کردی۔

سعودی ایوی ایشن اتھارٹی کے مطابق سعودی آنے والی تمام ایئرلائنز مسافروں کے مقرر کردہ حد سے زیادہ سامان لوڈ کرنے سے اجتناب کریں، چیک ان کرتے وقت صرف مقررہ حد کے وزن کے سامان والے بیگیج کو جہاز میں بھیجا جائے۔

سعودی ایوی ایشن اتھارٹی کے مطابق مشاہدے میں آیا ہے کہ کچھ ایئرلائنز مسافروں کا مقررہ حد سے زیادہ سامان وصول کرتی ہیں، ٹکٹ جاری کرتے وقت سامان کے وزن کی مقررہ حد کی پالیسی واضح لکھی ہوتی ہے۔

تمام ایرلاینز کو ہدایات پر عمل کی پابندی کرنے پر زور دیتے ہوئے کہا گیا کہ زیادہ سامان والے بیگیج سے جہاز کو تیکنیکی طور پر مشکلات ہوتی ہیں لہذا ہدایات نامے کی خلاف ورزی پر ایئرلاینز کے خلاف سخت کارروائی ہوگی۔

بشکریہ جنگ