سرد موسم اور شدید بارش  کے باجود دھرنے میں لوگوں کی شرکت کا سلسلہ جاری

کراچی:شدید سرد موسم ہونے کے باوجودکالے بلدیاتی قانون کے خلاف جماعت اسلامی کے دھرنے کے ماحول میں جوش و خروش اورہر گزرتے دن کے ساتھ دھرنے کے شرکاء کی تعداد میں مسلسل اضافہ ہورہا ہے۔

صبح سے بارش کے باوجود شہر بھر سے مختلف اسکولوں کے ہزاروں طلبہ نے اپنے اساتذہ کے ہمراہ اورنیشنل لیبر فیڈریشن ،اسلامک لائرز موومنٹ،آباد ،اقلیتی برادری سمیت کے پی کے ،صوبہ پنجاب اور اندرون سندھ سے مختلف وفود دھرنے میں شریک ہوتے رہے ۔

امیر جماعت اسلامی کراچی حافظ نعیم الرحمن نے شرکاء سے خطاب کرتے ہوئے کہاکہ آج کے طلبہ قوم کامستقبل ہیں ، بد قسمتی ہے کہ سندھ حکومت نے صحت ،ٹرانسپورٹ سمیت تعلیم کے شعبے کو بھی مکمل برباد کردیا ہے ،کراچی کے شہری مہنگائی کے دور میں اپنا پیٹ کاٹ کر بچوں کو نجی اسکولوں میں تعلیم دلوانے پر مجبور ہیں۔

امیر جماعت اسلامی کراچی کا کہنا تھا کہ  سندھ حکومت کے زیر انتظام ہزاروں اسکول تعلیمی معیار اور بنیادی سہولیات کی محرومی کی وجہ سے وڈیروں اور جاگیرداروں کی اوطاق اور اصطبل بنے ہوئے ہیں ۔

انہوں نے کہا کہ کل 7جنوری جمعہ کے دن امیرجماعت اسلامی پاکستان سراج الحق دھرنے کے شرکاء سے خصوصی خطاب اور آئندہ کے لاءحہ عمل کا اعلان کریں گے،یہ دھرنا ایک بڑے تاریخی جلسے اور نئی تحریک میں تبدیل ہوجائے گا ۔ حافظ نعیم الرحمن نے کہاکہ وزیر اعلیٰ مراد علی شاہ صوبے میں بہترین صحت کی سہولیات کا مسلسل دعویٰ کرتے ہیں ،ہم ان سے سوال کرتے ہیں کہ اگر اندرون سندھ کے عوام کو بہترین طبی سہولیات میسر ہیں تو وہاں کے شہریوں کو معمولی بیماریوں کاعلاج بھی کروانے کے لیے کراچی کیوں بھیجا جاتا ہے؟

حافظ نعیم الرحمن کا کہنا تھا کہ حقیقت یہ ہے کہ صوبائی وزراء کے تمام دعوے جھوٹے ثابت ہورہے ہیں ،پیپلزپارٹی نے اندرون سندھ پر قبضہ کر کے پہلے سندھیوں اور ہاریوں کو محروم و محکوم بنایا اور اب کراچی پر قبضہ کر کے شہریوں کو اپنا غلام بنانا چاہتے ہیں۔

 انہوں نے مزیدکہاکہ جماعت اسلامی کراچی اور سندھ کے عوام کا مقدمہ لڑرہی ہے ،آج کالے بلدیاتی قانون کے خلاف سندھ اسمبلی کے باہر دھرنے کا ساتواں دن ہے اور قانون واپس لینے تک ہمارادھرنا جاری رہے گا۔

امیر جماعت اسلامی کراچی کا کہنا تھا کہ شہر کے ساڑھے تین کروڑ عوام کے لیے ٹرانسپورٹ کا سرے سے کوئی بندوبست ہی موجود نہیں ہے ،پورا کراچی چنگچی رکشوں ،ٹوٹی پھوٹی ہوئی بسوں اور تباہ حال سڑکوں پر سفر کرنے پر مجبور ہے،گزشتہ دنوں پی ٹی آئی کی حکومت نے گرین لائن منصوبے کا جعلی افتتاح کیا جسے کراچی کے عوام کو کوئی فائدہ نہیں ہوا،5سال گزرنے کے بعد بھی آج تک گرین لائن کے مکمل اسٹیشن تک نہیں بن سکے جس کی وجہ سے شہری سفر نہیں عذاب بھگت رہے ہیں ۔

 امیرجماعت اسلامی نے کہاکہ وزیر اعلیٰ سندھ مراد علی شاہ کہتے ہیں جماعت اسلامی کا سات روز سے جاری دھرنا ایم کیو ایم کاطرز سیاست ہے ،انہیں نہیں معلوم کہ ہم نے شہر کی تعمیر و ترقی کے لیے قربانیاں دی ہیں ،کراچی سے شروع ہونے والا دھرنا اور احتجاجی تحریک کا دائرہ بدین، ٹھٹھہ، لاڑکانہ ،کوٹری اور دیگر علاقوں تک وسیع کیا جائے گا۔