سربراہ ریلیف کمیٹی احسن اقبال کا صوبائی حکومتوں کو خط

ریلیف کمیٹی کے سربراہ، وفاقی وزیر احسن اقبال نے صوبائی حکومتوں کو قومی لائحہ عمل کے تحت سیلاب زدگان کی مدد کے لیے خط لکھ دیا۔

وزیرِ اعظم شہباز شریف کی ہدایت پر ریلیف کمیٹی کے سربراہ احسن اقبال نے چاروں صوبائی وزرائے اعلیٰ کو خطوط بھجوا دیے۔

احسن اقبال کی جانب سے وزیرِ اعظم آزاد جموں و کشمیر اور وزیرِ اعلیٰ گلگت بلتستان کو بھی خطوط ارسال کیے گئے ہیں۔

وفاقی وزیر نے خط کے ذریعے وزرائے اعلیٰ، وزیرِ اعظم آزاد کشمیر اور وزیرِ اعلیٰ گلگت بلتستان سے ملاقات کا وقت مانگ لیا۔

بارشوں سے سب کچھ برباد ہوگیا، راستے بند ہونے کے باعث متاثرین تک نہ کھانا پہنچا اورنہ پانی، جانور بھی پیاس سے نڈھال ہیں۔

خط میں احسن اقبال نے کہا ہے کہ جلد ملاقات کا وقت دیا جائے تاکہ سیلاب زدگان کی مدد کے اقدامات پر اشتراکِ عمل وضع ہو سکے۔

انہوں نے کہا ہے کہ این ڈی ایم اے نے سیلاب سے ہونے والے نقصانات کا ابتدائی تخمینہ دیا ہے، وزیرِ اعظم نے کہا ہے کہ متاثرہ علاقوں اور عوام کی مدد کے لیے مشترکہ حکمتِ عملی بنائی جائے۔

ریلیف کمیٹی کے سربراہ کا خط میں مزید کہنا ہے کہ وزیرِ اعظم شہباز شریف کی ہدایت کی روشنی میں ہر صوبہ ایک فوکل پرسن مقرر کرے تاکہ سیلاب زدگان کی امداد کے عمل کو تیز کیا جا سکے، شہباز شریف نے سیلاب زدگان کی مدد اور بحالی کے لیے میری سربراہی میں کمیٹی بھی بنائی ہے۔

وفاقی وزیر کا اپنے خط میں یہ بھی کہنا ہے کہ وزیرِ اعظم شہباز شریف نے ہدایت دی ہے کہ وفاق اور صوبوں کے درمیان خصوصی خطوں کے درمیان اشتراکِ عمل پیدا کیا جائے، سیلاب متاثرین کی مدد اور بحالی قومی مقصد ہے جس کے لیے سب کو مل کر کام کرنا ہے۔

بشکریہ جنگ