ساڑھی پہننے والی خاتون کی ریستوران میں داخلے پر پابندی

ایک بھارتی خاتون نے الزام لگایا ہے کہ ساڑھی پہننے کی وجہ سے دہلی کے ایک ریستوران میں اُنہیں داخلے کی اجازت نہیں دی گئی۔

بھارتی میڈیا رپورٹس کے مطابق یہ واقعہ حال ہی میں دہلی کے ایکولا دہلی نامی ریستوران میں پیش آیا جہاں خاتون کو ریسٹورنٹ کے عملے نے صرف اس وجہ سے ریستوران میں داخل ہونے سے روک دیا کہ خاتون نے ساڑھی پہنی ہوئی تھی۔

ایکولا دہلی نامی ریستوران کی ایک ویڈیو سوشل میڈیا پر وائرل ہو رہی ہے جس میں ایک خاتون کو ریستوران کے عملے کے ساتھ بات چیت کرتے ہوئے دیکھا جاسکتا ہے۔

ویڈیو میں سنا جا سکتا ہے کہ خاتون ریستوران کے عملے سے کہہ رہی ہے کہ  مجھے دکھائیں جہاں لکھا ہے کہ ساڑھی پہن کر ریستوران میں داخل ہونے کی اجازت نہیں ہے۔

خاتون کی درخواست پر، ریستوران کے عملے میں شامل ایک خاتون نے کہا  کہ ’میڈم، ہم صرف جدید اور ماڈرن لباس والی خواتین کو ریستوران میں آنے کی اجازت دیتے ہیں اور ساڑھی اُن ملبوسات میں نہیں آتی۔‘

بشکریہ جنگ