ذیابطیس کے مریضوں کی تشخیص اور علاج کیلئے 3000 کلینکس کا منصوبہ شروع

ذیابطیس کے 3 کروڑ 30 لاکھ لوگوں کے علاج کےلیے ہیلتھ پروموشن فاؤنڈیشن نے ملک بھر میں 3 ہزار کلینکس بنانے کے پروجیکٹ کا آغاز کردیا ہے، کراچی کے علاقے ناظم آباد میں پہلا کلینک قائم کردیا گیا۔

منصوبے کے تحت ملک بھر میں قائم پرائمری، سیکنڈری اور ٹرشری کیئر کلینکس مفت کنسلٹینسی، رعایتی نرخ پر ادویات اور ٹیسٹس کی سہولت فراہم کریں گے۔

ماہرین امراض ذیابطیس کا کہنا ہے کہ پاکستان میں سالانہ ذیابطیس کا شکار 4 لاکھ افراد معذور ہوجاتے ہیں، منصوبے کا مقصد لوگوں کو معذوری سے بچانا ہے اور سفید پوش افراد تک صحت کی سہولیات پہنچانا ہے۔

ہیلتھ پروموشن فاؤنڈیشن کے تحت ملک بھر میں تین ہزار ڈائیابٹیز کلینک کے قیام کےلیے نیشنل ڈائیابٹیز نیٹ ورک کا آغاز کردیا گیا ہے۔ ہیلتھ پروموشن فاؤنڈیشن، بقائی انسٹیٹیوٹ آف ڈائیبیٹالوجی اینڈ اینڈوکرائنالوجی کے تحت ملک بھر میں تین ہزار ڈائیابٹیز کلینک قائم کیے جائیں گے۔

پیر کی شب کراچی میں منصوبے کی افتتاحی تقریب منعقد ہوئی جس کے مہمان خصوصی فیڈریشن آف آل پاکستان چیمبرز آف کامرس اینڈ انڈسٹری کے سینئر وائس پریزیڈنٹ سلیمان چاؤلہ تھے۔

اس موقع پر ہیلتھ پروموشن فاؤنڈیشن کے چیئرمین امتیاز زبیری، وائس چیئرمین اور ماہر امراض ذیابطیس پروفیسر عبدالباسط، جنرل سیکریٹری ڈاکٹر ظفر اقبال عباسی، پروفیسر محمد یعقوب احمدانی، مختار احمد اور پروفیسر اشعر فواد بھی موجود تھے۔

سلیمان چاؤلہ کا کہنا تھا کہ ڈاکٹر عبدالباسط اور ان کی ٹیم ذیابطیس کی روک تھام کےلیے جو کاوشیں اور کوششیں کر رہی ہے وہ قابل تحسین ہے، اللّٰہ تعالیٰ نے بھی انسان کو کوشش کا کہا ہے، یہ لوگ پاکستان کا سرمایہ ہیں اور ان ہی لوگوں کی وجہ سے آج یہ ملک قائم و دائم ہے۔

ان کا مزید کہنا تھا کہ یہ چھوٹی سی ٹیم جس لگن سے کام کر رہی ہے اس کی قدر کرنی چاہیے۔ اس موقع پر انہوں نے اعلان کیا کہ تین ہزار میں سے ایک کلینک کا پورا خرچہ وہ برداشت کریں گے۔

انہوں نے کہا کہ شوگر خاموش بیماری ہے اس پر قابو نہ پایا گیا تو جان لیوا اور معذور کر دینے والی بیماری بن جاتی ہے، اس لیے ہمیں لوگوں کو شعور دینا ہوگا کہ وہ صحت مند طرز زندگی اپنا کر اس بیماری سے بچ سکتے ہیں۔

پروجیکٹ کے وائس چیئرمین اور معروف ماہر امراض ذیابطیس ڈاکٹر عبدالباسط نے کہا کہ پاکستان دنیا بھر میں شوگر کے اعدادوشمار کے اعتبار سے تیسرے نمبر پر ہے اور ملک میں تین کروڑ 30 لاکھ ذیابطیس کے مریض موجود ہیں اورذیابطیس کا شکار سالانہ چار لاکھ افراد پاؤں کے زخم کی وجہ سے عمر بھر کےلیےمعذور ہوجاتے ہیں۔

پروفیسر عبدالباسط نے کہا کہ 26 سال کی محنت کا ثمر ہے کہ ذیابطیس پر قابو پانے کےلیے تین ہزار کلینک کے قیام کا پروجیکٹ شروع کر رہے ہیں۔ اس سے پہلے ہم نے فٹ کلینکس کا آغاز کیا تھا اور پاکستان میں 150 فٹ کلینکس کا ایک نیٹ ورک قائم کیا جس کے نتیجے میں پاؤں اور ٹانگیں کٹنے میں نمایاں کمی ہوئی ہے۔

انہوں نے کہا کہ وہ شوگر کے مریضوں کےلیے جوتے بنا رہے ہیں تاکہ شوگر کے مریضوں کے پیروں میں زخم ہی نہ ہوں اور انہیں معذوری سے بچایا جاسکے، یہ جوتے بھی مارکیٹ کے مقابلے میں انتہائی سستے فراہم کیے جاتے ہیں۔

ڈاکٹر عبدالباسط کا کہنا تھا کہ انہوں نے اب تک 77 ہزار مریضوں کو اسکرین کیا اور 10 ہزار کو جوتے فراہم کیے۔ سندھ میں دو ہزار بچوں کو فری انسولین اور بلوچستان میں 252 بچوں کو مفت انسولین دے رہے ہیں، جلد ملک کے مزید 3 ہزار بچوں کو انسولین دینے جا رہے ہیں۔

انہوں نے مزید کہا کہ ٹائپ ون ڈائیابٹیز کے پاکستان میں 50 ہزار مریض ہیں اور ٹائپ ٹو ذیابطیس کے 3 کروڑ 30 لاکھ مریض ہیں اور ان کے لیے پروجیکٹ شروع کرنے چاہئیں۔

پروفیسر عبدالباسط کا مزید کہنا تھا کہ ایک ادویہ ساز ادارے نے آدھی قیمت پر انسولین دینے کا منصوبہ شروع کیا ہے جو کہ مریضوں کو ان کے ذریعے فراہم کی جارہی ہے۔

ان کا کہنا تھا کہ انہوں نے ڈائیابٹیز رجسٹری بنائی ہے جس کا 8 سال کی محنت کے بعد قیام عمل میں آیا ہے اور حکومت پاکستان اس کی سرپرستی کر رہی ہے۔

ڈاکٹر عبدالباسط نے کہا کہ ان کے قائم کردہ تین ہزار کلینکس پرائمری کیئر لیول کے کلینکس ہوں گے اس کے اوپر سیکنڈری کیئر سینٹر ہوں گے اور ان کے اوپر ٹرشری کیئر سینٹرز ہوں گے۔

انہوں نے کہا کہ ان کلینکس پر مریضوں کا مفت معائنہ کریں گے اور کوئی فیس نہیں لیں گے جبکہ آدھی قیمت پر دوا دی جائے گی۔

پروجیکٹ کے چیئرمین امتیاز زبیری نے کہا کہ ہیلتھ پروموشن کا قیام 2017 میں آیا اور اس کا مقصد سفید پوش افراد کو صحت کی سہولیات فراہم کرنا تھا، ایسے افراد جو مہنگائی کی وجہ سے علاج معالجے کے اخراجات برداشت نہیں کر سکتے۔

بشکریہ جنگ