دنیا بھر میں کورونا ویکسین لگانے کا عمل جاری

دنیا بھر میں کورونا وائرس سے بچاؤ کی ویکسین عوام کو لگائے جانے کا عمل جاری ہے۔

خبرایجنسی کے مطابق امریکا سمیت مختلف ملکوں میں اسٹیڈیم، گرجا گھر اور تھیم پارک عارضی ویکسینیشن سینٹرز میں تبدیل کردیے گئے ہیں۔

جنوبی افریقا میں پہلی کورونا ویکسین آسٹرا زینیکا کی 10 لاکھ خوراکیں پہنچا دی گئی ہیں جبکہ فرانس میں آسٹرازینیکا ویکسین اگلے ہفتے پہنچائی جائے گی۔

خبرایجنسی کا کہنا ہے کہ اٹلی کے مختلف ریجن میں پابندیوں میں نرمی کردی گئی ہے، دوسری جانب یونان میں تعلیمی اداروں میں کورونا وائرس کے کیسز سامنے آنے کے بعد 200 تعلیمی ادارے بند کردیے گئے۔

امریکا میں گزشتہ ماہ کورونا وائرس سے95 ہزار اموات ہوئیں، یہ اموات امریکا میں ہونے والی مجموعی اموات کا 22 فیصد ہیں۔

امریکی ماہر ڈاکٹر کا کہنا ہے کہ ویکسینیشن سے کورونا وائرس کے میوٹیشن کو روکنے میں مدد ملے گی۔

بشکریہ جنگ