حکومت سے کیا مذاکرات ہو رہے ہیں میرے علم میں نہیں ہے، پرویزخٹک

پاکستان تحریک انصاف (پی ٹی آئی) کے سینئر رہنما پرویز خٹک کا کہنا ہے کہ حکومت سے کیا مذاکرات ہو رہے ہیں میرے علم میں نہیں ہے، مذاکرات سے متعلق صرف صدر مملکت بہتر بتاسکتے ہیں۔

زمان پارک کے باہر میڈیا سے گفتگو کرتے ہوئے پرویز خٹک نے کہا کہ پنجاب اور کے پی اسمبلی کی تحلیل کی تاریخ صرف عمران خان کو معلوم ہے، ابھی تک تحلیل کی تاریخ کا فیصلہ نہیں ہوا۔

پرویز خٹک نے کہا کہ ق لیگ اہم اتحادی ہے، ق لیگ والے اپنی کمٹمنٹ پر کھڑے ہیں، ہفتے کے روز عمران خان اسمبلیاں تحلیل کی تاریخ کا اعلان کریں گے۔

پی ٹی آئی رہنما نے کہا کہ پی ڈی ایم ماہرین نے ملک کو جس گرداب میں پھنسا دیا اس سے نکلنے کا راستہ صرف الیکشن ہیں، حکومت سے مذاکرات مشروط ہیں، ان میں الیکشن کی تاریخ پر بھی گفتگو ہونی چاہیے۔

پرویز خٹک نے کہا کہ چوہدری نثار سے کوئی رابطہ نہیں، انہیں مشورہ دوں گا سیاست کریں۔

بشکریہ جنگ