حسن علی نے بھی کہہ دیا ’پیٹرول بہت مہنگا ہے‘

پاکستان کرکٹ ٹیم کے فاسٹ بولر حسن علی نے بھی کہہ دیا کہ پیٹرول بہت مہنگا ہے۔

کراچی میں کھیلے گئے پاکستان سپر لیگ کے 13 ویں میچ میں اسلام آباد یونائیٹڈ کے حسن علی نے کوئٹہ گلیڈی ایٹرز کے 3 کھلاڑیوں کو آؤٹ کیا۔

حسن علی نے میچ میں وکٹس حاصل کرنے کے بعد اپنے روایتی انداز میں جشن نہیں منایا تو مداحوں کو تشویش ہو گئی۔

پی ایس ایل کے سوشل میڈیا اکاؤنٹ پر بھی اس حوالے سے پوسٹ کی گئی۔

پی ایس ایل کے ٹوئٹر اکاؤنٹ پر حسن علی کی وکٹس حاصل کرنے کی ویڈیو شیئر کرتے ہوئے لکھا گیا کہ ’جنریٹر چلاؤ یار‘۔

اس ٹوئٹ کا جواب دیتے ہوئے حسن علی نے لکھا کہ ’پیٹرول بہت مہنگا ہے‘۔

حسن علی نے اپنے جواب کے ساتھ مذاق کا ایموجی بھی استعمال کیا۔

پاکستان سپر لیگ کے میچز کے دوران کھلاڑیوں کی دوستیاں بھی خوب دیکھنے کو مل رہی ہیں جسے شائقین بہت زیادہ پسند کر رہے ہیں۔

واضح رہے کہ جمعے کو کھیلے گئے ایچ بی ایل پی ایس ایل 8 کے 13ویں میچ میں اسلام آباد یونائیٹڈ نے کوئٹہ گلیڈی ایٹرز کو 63 رنز سے شکست دے کر ایونٹ میں تیسری فتح اپنے نام کی تھی۔

بشکریہ جنگ