تمام وزراء عبدالقدیر خان کے جنازے میں شرکت کریں گے، شیخ رشید

وزیر داخلہ شیخ رشید نے کہا ہے کہ وزیر اعظم عمران خان کی ہدایت پر تمام وفاقی وزراء ڈاکٹر عبدالقدیر خان کے جنازے میں شرکت کریں گے۔

اسلام آباد میں میڈیا سے گفتگو کرتے ہوئے شیخ رشید کا کہنا تھا کہ تمام سروسز چیفس اور آرمی چیف جنرل قمر جاوید باجوہ بھی نماز جنازہ میں شریک ہونگے۔

محسنِ پاکستان، ایٹمی سائنسدان ڈاکٹر عبد القدیر خان آج صبح رضائے الٰہی سے انتقال کر گئے۔

انہوں نے کہا کہ پورے اعزاز کے ساتھ ڈاکٹر عبدالقدیر خان کی تدفین کی جائیگی، اسلامی یونیورسٹی کے وائس چانسلر ان کی نماز جنازہ پڑھائیں گے۔

وزیر داخلہ کا مزید کہنا تھا کہ فیصل مسجد اور ایچ ایٹ میں بھی تدفین کے انتظامات کررہے ہیں، ڈاکٹر قدیر کی فیملی سے مشورے کے بعد انکی تدفین کا فیصلہ کیا جائے گا۔

وزیرِ اعظم عمران خان نے محسنِ پاکستان، ایٹم بم کے خالق ڈاکٹر عبدالقدیر خان کی تدفین اسلام آباد کی فیصل مسجد کے احاطے میں کرنے کا اعلان کر دیا ہے۔

ان کا یہ بھی کہنا تھا کہ ڈاکٹر عبدالقدیر کے انتقال پر سوگ میں پرچم سرنگوں رہے گا۔

واضح رہے کہ محسنِ پاکستان، ممتاز ایٹمی سائنسدان ڈاکٹر عبدالقدیر خان طویل علالت کے باعث اسلام آباد میں انتقال کر گئے۔

مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف نے ڈاکٹرعبدالقدیر خان کے انتقال پرافسوس کا اظہار کرتے ہوئے کہا ہے کہ پاکستان کے جوہری پروگرام کے معمار کی وفات قومی صدمہ ہے

ذرائع نے بتایا ہے کہ طبیعت بہت زیادہ خراب ہونے کی وجہ سے ڈاکٹر عبدالقدیر خان کو صبح 6 بجے کے آر ایل اسپتال لایا گیا تھا۔

مرحوم کے اہلِ خانہ کا کہنا ہے اُن کی نماز جنازہ 3 بج کر 30 منٹ پر فیصل مسجد میں ادا کی جائے گی۔

بشکریہ جنگ