بپر جوائے کی شدت برقرار ہے، کراچی میں 13 سے 16 جون کے درمیان موسلادھار بارش کا امکان

بحیرۂ عرب میں موجود سمندری طوفان بپر جوائے کی شدت برقرار ہے، کراچی، حیدرآباد میں 13 سے 16 جون کے درمیان آندھی کے ساتھ موسلادھار بارش کا امکان ہے، ٹنڈومحمد خان، ٹنڈوالہ یار اور میرپورخاص میں بھی بارش ہو سکتی ہے۔

سمندری طوفان کراچی کے ساحل سے 690 کلومیٹر دور ہے، سمندری ہوائیں 15 جون کو ٹھٹھہ کے ساحل کیٹی بندر اور بھارتی ریاست گجرات کو عبور کریں گی۔

ٹھٹھہ اور بدین کے اسپتالوں میں ہنگامی حالت نافذہوگئی، سرکاری ملازمین کی چھٹیاں منسوخ کردی گئیں۔

طوفان کے دوران کیٹی بندر اور اس کے اطراف سمندری لہریں 8 سے 12 فٹ تک بلند ہو سکتی ہیں۔

محکمۂ  موسمیات نے ماہی گیروں کو طوفان ختم ہونے تک کھلے سمندر میں نہ جانے کی ہدایت کر دی ہے۔

ٹھٹھہ اور بدین کے اسپتالوں میں ہنگامی حالت نافذ کی گئی ہے جبکہ  تھرپارکر کے مختلف علاقوں سے عوام کو محفوظ مقامات پر منتقلی کی ہدایت کی گئی ہے۔

ضلع سجاول میں بھی ہائی الرٹ جاری کردیا گیا ہے، گوادر کے ساحل پر دفعہ 144 نافذ کردی گئی ہے۔

بشکریہ جنگ