بلوچستان بلدیاتی انتخابات، آزاد امیدواروں کی واضح اکثریت

بلوچستان کے بلدیاتی انتخابات میں آزاد امیدواروں نے واضح اکثریت حاصل کرلی، اب تک 1 ہزار 456 نشستیں آزاد امیدواروں نے سمیٹ لی ہیں۔

غیرحتمی اور غیر سرکاری نتائج کے مطابق سیاسی جماعتوں میں جمعیت علمائے اسلام (ف) سب سے آگے ہے۔

جے یو آئی نے کارپوریشن کی 14، میونسپل کمیٹیوں کی 57 اور یونین کونسلوں کی 185 نشستیں جیت کر اپنی نشستوں کی تعداد 256 تک پہنچا لی ہے۔

حکمران جماعت بلوچستان عوامی پارٹی 213 سیٹوں کے ساتھ دوسرے نمبر پر ہے، پشتون خوا میپ 95 نشستوں کے ساتھ تیسرے نمبر پر آگئی۔

غیر حتمی اور غیر سرکاری نتائج کے مطابق جماعت اسلامی کے مولانا ہدایت الرحمان بلوچ کی قیادت میں حق دو تحریک نے 56 حلقوں میں کامیابی حاصل کی ہے۔

بلدیاتی انتخابات میں نیشنل پارٹی نے 93 سیٹیں حاصل کی ہیں جبکہ اختر مینگل کی جماعت بی این پی نے 78 سیٹیں جیتی ہیں۔

پیپلزپارٹی 58 اور بی این پی عوامی 43 سیٹوں پر کامیاب ہوئی ہیں، اسی طرح اے این پی کو 24 اور پی ٹی آئی کو 23 نشستیں ملی ہیں۔

جمہوری وطن پارٹی نے 18، مسلم لیگ (ن) نے 15 نشستیں جبکہ جماعت اسلامی نے 7 سیٹیں حاصل کی ہیں۔

بشکریہ جنگ