ایپکس کمیٹی نے دوست ممالک سے سرمایہ لانے کے منصوبوں کی منظوری دی

ایپکس کمیٹی نے دوست ممالک سے سرمایہ کاری راغب کرنے کیلئے وزارتوں کے منصوبوں کی حتمی منظوری دے دی۔

وزیراعظم شہباز شریف کی زیر صدارت خصوصی سرمایہ کاری سہولت کونسل کی تیسری ایپکس کمیٹی کا اجلاس ہوا، جس میں آرمی چیف، وزرائے اعلیٰ اور وفاقی وزراء نے شرکت کی۔

اسپیشل انویسمنٹ فیسیلیٹیشن کونسل (ایس آئی ایف سی) کی ایپکس کمیٹی کے اجلاس میں آرمی چیف جنرل عاصم منیر، مسلح افواج کے دیگر افسران، وفاقی وزیر خزانہ اسحاق ڈار، وزیر دفاع خواجہ آصف، وزیر اطلاعات مریم اورنگزیب، وزیر ترقی و  منصوبہ بندی احسن اقبال، وزیر انفارمیشن ٹیکنالوجی امین الحق، وزیر مملکت برائے پیٹرولیم مصدق ملک اور معاونین نے شرکت کی۔

اعلامیے میں کہا گیا ہے کہ وزیر اعظم نے مختصر مدت میں ایس آئی ایف سی کے تیز رفتار آپریشنلائزیشن اور باہمی تعاون کے ذریعے اس کے موثر کام کو سراہا۔

ایپکس کمیٹی نے زراعت/ لائیو اسٹاک، کان کنی/ معدنیات، انفارمیشن ٹیکنالوجی (آئی ٹی) اور توانائی کے اہم شعبوں میں دوست ممالک سے سرمایہ کاری کو راغب کرنے کیلئے وزارتوں کی طرف سے پیش کیے گئے منصوبوں کی حتمی منظوری دی۔

اجلاس نے ایس آئی ایف سی کے پلیٹ فارم سے سعودی عرب کے اعلیٰ سطح کے وفد کے پاکستان کے آئندہ دورے کے کامیاب انعقاد کیلئے ہر طرح کی حمایت کا اظہار کرتے ہوئے دورے کو ایک اہم تقریب بنانے کی ہدایت کی۔

وفد کے پاکستان کے آئندہ دورے کے کامیاب انعقاد کے لیے ہر طرح کی حمایت کا اظہار کیا۔

بشکریہ جنگ