ایلون مسک کا ٹوئٹر پر ویڈیو کالز کیلئے نیا فیچر متعارف کروانے کا فیصلہ

ٹوئٹر کے چیف ایگزیکٹو ایلون مسک نے مائیکرو بلاگنگ ویب سائٹ ٹوئٹر پر آڈیو اور ویڈیو کالز اور انکرپٹڈ میسجنگ کے لیے نیا فیچر متعارف کرنے کا فیصلہ کیا ہے۔

گزشتہ برس ایلون مسک نے ٹوئٹر کو ایک ایسی ویب سائٹ بنانے کا فیصلہ کیا تھا جہاں ایک وقت میں صارفین کو بہت سی سہولیات فراہم کی جاسکیں۔

ایلون مسک نے منگل کو اپنے ایک ٹوئٹ میں بتایا کہ جلد ہی آپ کے ٹوئٹر ہینڈل سے آڈیو اور ویڈیو چیٹ بھی ہوگی تاکہ آپ دنیا میں کہیں بھی لوگوں کو اپنا فون نمبر دیئے بغیر بات کر سکیں۔

ٹوئٹر پر کال کا فیچر متعارف ہونے کے بعد مائیکرو بلاگنگ پلیٹ فارم کو میٹا کی سوشل میڈیا ایپس فیس بک اور انسٹاگرام جیسا بن جائے گا۔

ایلون مسک نے بتایا کہ بدھ سے شروع ہونے والے انکرپٹڈ ڈائریکٹ میسجز کا ایک ورژن ٹوئٹر پر دستیاب ہوگا لیکن یہ نہیں بتایا کہ آیا کالز کو بھی انکرپٹڈ کیا جائے گا یا نہیں۔

واضح رہے کہ حال ہی میں ٹوئٹر نے کئی سالوں سے غیر فعال اکاؤنٹس کو بھی ڈیلیٹ کرنے کے عمل کو شروع کرنے کے فیصلے کا اعلان کیا ہے۔

بشکریہ جنگ