ایف آئی اے نے پی ٹی آئی کے کراچی میں 3 بینک اکاؤنٹس کی تفصیلات حاصل کرلیں

ممنوعہ فنڈز کی تحقیقات کے معاملے میں وفاقی تحقیقاتی ادارے (ایف آئی اے) حکام نے پاکستان تحریک انصاف (پی ٹی آئی) کے کراچی میں کھلوائے گئے تین بینک اکاؤنٹس کی تفصیلات حاصل کرلیں۔

ذرائع کا کہنا ہے کہ اکاؤنٹس نجی بینک کی زمزمہ برانچ میں سال 2005 میں کھلوائے گئے تھے، پی ایس 113 پی ٹی آئی کے نام سے کھولے گئے اکاؤنٹس میں 3 کروڑ 94 لاکھ 71 ہزار 630 روپے کی ٹرانزیکشن ہوئیں۔

حکام کا کہنا ہے کہ کراچی میں بینکوں کے نمائندے ایف آئی اے میں پیش ہوگئے ہیں، سابق گورنر سندھ عمران اسماعیل کو طلبی کا نوٹس موصول نہیں ہوسکا، جس پتے پر نوٹس بھیجا گیا وہاں سے بتایا گیا ہے کہ وہ اب وہاں نہیں رہتے۔

تحقیقاتی ذرائع کا کہنا ہے کہ مذکورہ بینک اکاؤنٹ کو سال2011 سے جولائی 2012 تک استعمال کیا گیا، پی ٹی آئی ویمن ونگ کے اکاؤنٹ میں 10 لاکھ 77 ہزار 850 روپے کی ٹرانزیکشن ہوئیں، اکاؤنٹ دسمبر 2011 کے بعد فروری 2016 میں دوبارہ فعال کیا گیا، دسمبر 2011 تک جمع کروائی گئی رقم فروری 2016 میں نکالی گئی۔

ذرائع ایف آئی اے کا کہنا ہے کہ پی ٹی آئی کے نام سے کھلوائے گئے تیسرے اکاؤنٹ میں 87 لاکھ 273 روپے کی ٹرانزیکشن ہوئیں، سال2011  میں کھلوایا گیا یہ اکاؤنٹ بھی 2016 میں غیر فعال کردیا گیا۔

ذرائع ایف آئی اے کا کہنا ہے کہ ایف آئی اے نے رقم جمع کروانے والے افراد کا ریکارڈ بھی طلب کر لیا۔

بشکریہ جنگ