ایف آئی اے کا منی لانڈرنگ کیس، مونس الہٰی شاملِ تفتیش

سابق وفاقی وزیر چوہدری مونس الہٰی کو وفاقی تحقیقاتی ادارے ایف آئی اے نے منی لانڈرنگ کیس میں شاملِ تفتیش کر لیا۔

ق لیگ کے رہنما مونس الہٰی نے ایف آئی اے کو اپنی ضمانت کی روبکارجمع کرا دی، وہ 4 جولائی تک عبوری ضمانت پر ہیں۔

ایف آئی اے کے ذرائع کا کہنا ہے کہ مونس الہٰی پر 24 ارب روپے کی منی لانڈرنگ کا الزام ہے۔

اس سے قبل مونس الہٰی ایف آئی اے سے ملنے والے سوالات کے جوابات جمع کرا چکے ہیں۔

بینکنگ کورٹ لاہور نے منی لانڈرنگ کیس میں مونس الہٰی کی 4 جولائی تک عبوری ضمانت منظور کرلی۔

ایف آئی اے نے منی لانڈرنگ کیس میں مونس الہٰی سے 33 سوالات کے جوابات مانگے تھے۔

چوہدری مونس الہٰی نے ایف آئی اے کو چپڑاسی محمد نواز بھٹی سے متعلق سوالات پر جوابات جمع کرائے تھے۔

جوابات میں چوہدری مونس الہٰی کا کہنا تھا کہ میں چپڑاسی محمد نواز بھٹی کو نہیں جانتا۔

ایف آئی اے کے مطابق چپڑاسی محمد نواز بھٹی کے 32 بینک اکاؤنٹس ہیں۔

مونس الہٰی نے اپنے جوابات میں کہا تھا کہ نواز بھٹی کے اکاؤنٹس سے متعلق بھی معلوم نہیں۔

مونس الہٰی نے نواز بھٹی کے شیئرز سے متعلق بھی نفی میں جواب دیا تھا۔

چوہدری مونس الہٰی کا جمع کرائے گئے جوابات میں کہنا تھا کہ آر وائے کے گروپ بنانے میں میرا کوئی کردار نہیں، عمر شہر یار سے کاروباری تعلق ہے۔

مونس الہٰی نے ایف آئی اے کو جمع کرائے گئے جوابات میں کہا تھا کہ میرے بھائی راسخ الہٰی نے شیئرز تحفے میں دیے تھے، ایف بی آر میں جمع تفصیلات میں سب کچھ ڈکلیئرڈ ہے۔

ترجمان ایف آئی اے کا کہنا ہے کہ ملزمان مخدوم عمر شہریار اور طارق جاوید کی گرفتاری کے لیے چھاپے مارےجا رہے ہیں۔

منی لانڈرنگ کیس میں مونس الہٰی نے ضمانتی مچلکے بھی جمع کرائے تھے۔

وہ ضمانتی مچلکے جمع کرانے کے لیے بینکنگ جرائم کورٹ میں پیش ہوئے تھے۔

عدالت کی جانب سے مونس الہٰی کی 4 جولائی تک عبوری ضمانت منظور کرتے ہوئے انہیں 5 لاکھ روپے کے ضمانتی مچلکے جمع کرانے کی ہدایت کی گئی تھی۔

بشکریہ جنگ