ایران میں دہشت گردی پر پاکستان کی مذمت

ایران میں گزشتہ روز ہوئی دہشت گردی پر پاکستان کی جانب سے مذمت کی گئی ہے۔

نگراں وزیرِ اعظم انوار الحق کاکڑ کے معاونِ خصوصی علامہ طاہر محمود اشرفی نے کہا ہے کہ ایران میں دہشت گردی کی پاکستان مذمت کرتا ہے۔

ایک بیان میں ان کا کہنا ہے کہ غم کے ان لمحات میں ایران کی حکومت اور عوام کے ساتھ ہیں۔

طاہر محمود اشرفی نے مزید کہا ہے کہ شہداء کی بلندیٔ درجات اور زخمیوں کی صحت یابی کے لیے دعاگو ہیں۔

نگراں وزیرِ اعظم کے معاونِ خصوصی کا یہ بھی کہنا ہے کہ شہداء کے لواحقین اور زخمیوں سے ہمدردی کا اظہار کرتے ہیں۔

امریکی حکام کا کہنا ہے کہ ایران میں گزشتہ روز ہونے والے دھماکوں میں داعش ملوث ہو سکتی ہے۔

واضح رہے کہ گزشتہ روز ایران کے شہر کرمان میں قبرستان کے قریب 2 دھماکوں میں 103 افراد جاں بحق اور 170 زخمی ہو گئے تھی۔

ایرانی میڈیا کے مطابق دھماکا خیر مواد سے بھرے دو تھیلے قبرستان کے باہر رکھے گئے تھے۔

ایرانی کمانڈر قاسم سلیمانی بھی اسی قبرستان میں مدفون ہیں جن کی گزشتہ روزچوتھی برسی کے موقع پر وہاں سیکڑوں افراد فاتحہ خوانی کر رہے تھے کہ 2 دھماکے ہوئے۔

یاد رہے کہ قاسم سلیمانی کو 3 جنوری 2020ء کو عراق میں امریکی ڈرون حملے میں شہید کیا گیا تھا۔

بشکریہ جنگ