الیکشن کمیشن نے ہمیں ہر محاذ پر ہرانے کی کوشش کی: بیرسٹر گوہر

چیئرمین پی ٹی آئی بیرسٹر گوہر خان کا کہنا ہے کہ الیکشن کمیشن نے ہمیں ہر محاذ پر ہرانے کی کوشش کی، پشاور ہائیکورٹ نے تاریخی فیصلہ دیا ہے۔

اڈیالہ جیل کے باہر میڈیا سے گفتگو کرتے ہوئے بیرسٹر گوہر خان نے کہا کہ بانی پی ٹی آئی سے تفصیلی ملاقات ہوئی ہے، ٹکٹوں سے متعلق مشاورت کل مکمل ہو جائے گی، کل اعلان کریں گے۔

انہوں نے کہا کہ اگر بلا بحال نہ ہوتا تو ہمارے لیے کافی مشکلات ہوتی، کسی بھی سیاسی جماعت سے اس کا نشان واپس لینا غیر قانونی ہے، پرسوں تک ہمارے سارے امیدوار فائنل ہو جائیں گے۔

پاکستان تحریک انصاف (پی ٹی آئی) کے وکیل بیرسٹر علی ظفر کا کہنا ہے کہ اب پی ٹی آئی کو الیکشن جیتنے سے کوئی نہیں روک سکتا۔

بیرسٹر گوہر کا کہنا ہے کہ ٹکٹوں سے متعلق پیسوں کے لین دین کی بات درست نہیں، سائفر کیس حکم امتناع کل ختم ہو رہا ہے، اُمید ہے کل ہائی کورٹ کوئی اچھا فیصلہ دے گی۔

چیئرمین پی ٹی آئی نے کہا کہ سائفر کیس میں ہمارا مطالبہ ہے اس کا ٹرائل اوپن ہو، بانی پی ٹی آئی کو ہر مقدمے میں ملوث کیا جا رہا ہے۔

ان کا یہ بھی کہنا ہے کہ 8 فروری کو ان شاء اللّٰہ پی ٹی آئی جیت کر دکھائے گی، ووٹ کے حق کے لیے بانی پی ٹی آئی کے پوسٹل بیلٹ کے لیے بھی درخواست کریں گے۔

بشکریہ جنگ