افغان پناہ گزینوں کی برطانیہ میں آبادکاری کیلئے اسلام آباد سے خصوصی پروازیں

اسلام آباد انٹرنیشنل ایئرپورٹ سے افغان پناہ گزینوں کی برطانیہ میں آبادکاری کےلیے خصوصی پروازیں چلانے سے متعلق برطانوی ہائی کمیشن کے وفد اور سی اے اے حکام کی ملاقات ہوئی۔  

ترجمان سول ایوی ایشن اتھارٹی (سی اے اے) کا کہنا ہے کہ برطانوی ہائی کمیشن کے خصوصی وفد نے پروازوں کے حوالے سے سی اے اے کے سینئر حکام سے ملاقات کی۔ 

ترجمان نے بتایا کہ برطانوی ہائی کمیشن کے وفد کی قیادت پولیٹیکل قونصلر ذوئی وئیر نے کی جبکہ سی اے اے سینئر حکام کی قیادت ڈائریکٹر سیکیورٹی ایئر کموڈور (ر) شاہد قادر نے کی۔

سی اے اے حکام میں سی او او ایئرپورٹ منیجر اور ان کی سیکیورٹی ٹیم بھی شامل تھی۔ 

ترجمان کا کہنا تھا کہ ملاقات میں افغان پناہ گزینوں کی برطانیہ منتقلی کےلیے پروازوں کے حوالے سے اقدامات پر تبادلہ خیال کیا گیا۔ 

ڈائریکٹر سیکیورٹی سول ایوی ایشن نے ڈائریکٹر جنرل سول ایوی ایشن کا خصوصی پیغام برطانوی ہائی کمیشن وفد کو پہنچایا۔

ترجمان کے مطابق ملاقات میں اے این ایف، ایف آئی اے، کسٹمز، اے ایس ایف اور پی آئی اے کے نمائندے بھی موجود تھے۔

برطانوی وفد کے سربراہ ذوئی وئیر کا کہنا تھا کہ افغان پناہ گزینوں کی برطانیہ منتقلی کےلیے خصوصی پروازوں کے حوالے سے تعاون فراہم کرنے پر سی اے اے کے شکرگزار ہیں۔

بشکریہ جنگ