استعفے ہاتھ سے لکھے ہوئے نہیں، رد ہوجائیں گے، سینیٹر کامران مرتضیٰ

جمعیت علماء اسلام پاکستان کے سینیٹر کامران مرتضیٰ ایڈووکیٹ نے کہا ہے کہ پی ٹی آئی ارکان کے استعفے ہاتھ سے لکھے ہوئے نہیں ہیں، رد ہوجائیں گے۔

وزیر قانون و انصاف سینیٹر اعظم نذیر تارڑ نے کہا ہے کہ پی ٹی آئی ارکان کو استعفوں کی تصدیق کےلیے بلانے کی ضرورت نہیں۔

جیونیوز کے پروگرام کیپٹل ٹاک میں گفتگو کے دوران کامران مرتضیٰ نے کہا کہ قومی اسمبلی میں واپس آنا پی ٹی آئی کے مفاد میں ہے۔

انہوں نے کہا کہ پی ٹی آئی کے اراکین اب بھی پارلیمنٹ لاجز میں رہ رہے ہیں، ان کے استعفے ہاتھ سے لکھے ہوئے نہیں، اس لیے رد ہوجائیں گے۔

جے یو آئی سینیٹر نے مزید کہا کہ وزیراعلیٰ خیبرپختونخوا محمود خان صوبے کی فورس استعمال نہیں کرسکتے ہیں۔

سینئر سیاستدان وسیم سجاد نے کہا ہے کہ وزیراعلیٰ خیبرپختونخوا محمود خان کا بیان آئین کے خلاف ہے۔

اُن کا کہنا تھاکہ اس قسم کا اقدام کیا گیا تو وزیراعلیٰ خیبرپختونخوا کو معطل بھی کیا جاسکتا ہے۔

سینیٹر کامران مرتضیٰ نے اس دوران استفسار کیا کہ انقلاب کو سپریم کورٹ کے تحفظ کی ضرورت کیوں پڑتی ہے؟

بشکریہ جنگ