آج کا فیصلہ اختیارات کے ناجائز استعمال کے خلاف آیا، نواز شریف سرخرو ہوئے، مریم اورنگزیب

مسلم لیگ ن کی مرکزی رہنما مریم اورنگزیب نے کہا ہے کہ تاحیات نا اہلی کا فیصلہ آئین کے خلاف تھا۔ 

ایک بیان میں انہوں نے کہا کہ کسی لاڈلے کو صادق اور امین کے سرٹیفکیٹ بانٹے اور کسی کو سزا دی گئی۔ آج کا فیصلہ اختیارات کے ناجائز استعمال کے خلاف آیا ہے۔

مریم اورنگزیب نے کہا اللّٰہ کے فضل و کرم سے نواز شریف اور ن لیگ سرخرو ہوئی، نواز شریف کا فیصلہ سے وقتی نقصان ہوا۔

مریم اورنگزیب نے کہا کہ ملک کا ناقابل تلافی نقصان ہوا۔ نواز شریف نے مشکل وقت میں فیصلہ اللّٰہ تعالیٰ پر چھوڑا تھا۔

انہوں نے کہا کہ نواز شریف کو سیاسی انتقام کا نشانہ بنانے کیلئے تاحیات نااہلی کی عدالتی ناانصافی کا سیاہ باب ختم ہوا۔ آئین کے آرٹیکل 62 ون ایف کی من چاہی تشریح کے ذریعے پاکستان اور عوام کو مہنگائی، معاشی تباہی اور بین الاقوامی رسوائی کی دلدل میں دھکیلا گیا۔

مریم اورنگزیب نے کہا کہ سیاہ کردار آج عدالت، عوام اور وقت کے کٹہرے میں مجرم قرار پائے۔ سیاسی و ذاتی مفادات کی خاطر عوام اور ترقی کرتے پاکستان کی بنیادیں تک ہلا ڈالیں۔

ان کا کہنا تھا کہ لاڈلے کو ’صادق اور امین‘ کا جعلی سرٹیفکیٹ دینے کے لئے منتخب وزیراعظم کو ہٹانے کی سازش کی گئی۔ آج یہ کہنا درست ہے کہ وتعز من تشاء و تزل من تشاء۔ قائد نواز شریف اور عوام کو مبارک ہو۔

بشکریہ جنگ