یوکرین: کیف میں 4 دھماکے

روس سے جنگ سے متاثرہ ملک یوکرین کے دارالحکومت کیف میں آج صبح 4 دھماکے ہوئے ہیں۔

یوکرینی دارالحکومت کیف کے میئر نے بتایا ہے کہ کیف کے ضلع شیو چینکو وسکی میں 4 دھماکے ہوئے ہیں۔

ان کا کہنا ہے کہ آج صبح ہونے والے دھماکوں کے بعد ایک رہائشی عمارت میں آگ لگ گئی۔

یوکرین میں روسی حملے کے بعد روسی فوج کی کارروائیاں جاری ہیں، کیف اور خار کیف میں کئی گھنٹوں کے سکون کے بعد پھر سے دھماکے سنے گئے ہیں۔

کیف کے میئر کا مزید کہنا ہے کہ دھماکوں سے متاثر ہونے والی 2 عمارتوں سے رہائشیوں کا انخلاء کرا لیا گیا ہے۔

میئر کیف کا یہ بھی کہنا ہے کہ اطلاع ملتے ہی ایمبولینسز، طبی عملے اور ریسکیو اہلکاروں کو دھماکوں کے مقام پر روانہ کیا گیا تھا جنہوں نے متاثرہ عمارت سے متعدد زخمی افراد کو نکال کر اسپتال منتقل کر دیا ہے۔

بشکریہ جنگ