گزشتہ ایک ہفتے میں سندھ پولیس کے 94 افسران و اہلکار کورونا کا شکار

گزشتہ 7 روز کے دوران سندھ پولیس کے 94 پولیس افسران و اہلکار عالمی وبا کورونا وائرس کا شکار ہوگئے۔

ترجمان سندھ پولیس کے مطابق کورونا وائرس سے متاثرہ پولیس افسران اور اہلکاروں کی تعداد 6250 ہوگئی ہے جبکہ کورونا کے باعث 24 پولیس افسران اور اہلکار انتقال کرگئے ہیں۔

ترجمان سندھ پولیس نے بتایا کہ کورونا وائرس سے متاثرہ 122 پولیس افسران اور اہلکار زیرعلاج ہیں۔

پاکستان میں کورونا کیسز کی شرح میں مسلسل اضافہ ہورہا ہے، گزشتہ 24 گھنٹوں کے دوران کورونا ٹیسٹ مثبت آنے کی شرح 6 اعشاریہ 5 فیصد رہی اور مزید 2ہزار 664افراد میں کورونا وائرس کی تصدیق ہوئی ہے جبکہ مزید 32 افراد اس وباء سے انتقال کر گئے ہیں۔

اُن کا مزید کہنا تھا کہ کورونا وائرس سے متاثرہ 6104 پولیس افسران اور اہلکار صحتیاب ہوچکے ہیں۔

واضح رہے کہ سندھ میں کورونا وائرس کے مریضوں کی تعداد دوسرے صوبوں سے زیادہ 2 لاکھ61 ہزار 179 ہو چکی ہے، جبکہ کُل اموات 4 ہزار453ہو گئیں۔

کورونا وائرس کے بڑھتے کیسز کے پیش نظرمظفرآباد کے سرکاری اور نجی اداروں میں ماسک کے بغیر داخلے پر پابندی عائد کردی گئی۔

دوسری جانب ملک بھر میں کورونا وائرس سے انتقال کرنے والوں کی مجموعی تعداد 13 ہزار 508 ہو گئی ہے جبکہ کُل مریضوں کی تعداد 6 لاکھ5 ہزار 200 ہو چکی ہے۔

بشکریہ جنگ