کراچی: کورنگی کاز وے پر ٹریفک جام کے دوران مسلح ملزمان کی لوٹ مار

کراچی کی ملیر ندی میں کورنگی انڈسٹریل ایریا کاز وے پر گزشتہ رات مسلح ملزمان نے ٹریفک جام کے دوران شہریوں سے لوٹ مار کی، تاہم پولیس کے پہنچنے سے قبل ہی ملزمان فرار ہو گئے۔

مقامی میڈیا نمائندوں کی لائیو کوریج کرنے والی گاڑی بھی اس طرف موجود تھی، تاہم بڑی گاڑی ہونے کی وجہ سے یہ افراد واردات کا نشانہ بننے سے محفوظ رہے۔

انہوں نے بتایا ہے کہ ملزمان کی تعداد 6 سے 8 کے درمیان تھی جو مسلح تھے، جنہوں نے بیچ سڑک پر کھڑے ہو کر شہریوں سے لوٹ مار کی۔

کراچی کے سائٹ ایریا میں مبینہ پولیس مقابلے میں ایک ڈاکو ہلاک ہو گیا۔

ملزمان نے شہریوں سے موبائل فون، نقد رقم اور دیگر قیمتی سامان لوٹ لیا۔

عینی شاہدین کے مطابق شادی میں شرکت کے لیے جانے والی ایک فیملی سے بھی ملزمان نے لوٹ مار کی اور ایک خاتون سے بدتمیزی کی۔

سینئر سپرنٹنڈنٹ پولیس کورنگی فیصل بشیر میمن نے رابطہ کرنے پر بتایا ہے کہ اطلاع ملتے ہی کورنگی انڈسٹریل ایریا تھانے کے ڈی ایس پی کی سربراہی میں پولیس کی بھاری نفری کازوے بھیج دی گئی تھی۔

موقع پر موجود افراد کے مطابق پولیس کے پہنچنے سے قبل ٹریفک جام بھی ختم ہو گیا تھا اور ملزمان بھی فرار ہونے میں کامیاب ہو گئے تھے۔

کراچی کے علاقے بلوچ کالونی سے کورنگی انڈسٹریل ایریا کو جانے والے کاز وے پر اس طرح کی وارداتیں عام ہو کر رہ گئی ہیں۔

بشکریہ جنگ