پولیس نے ایم کیو ایم کے زخمی ایم پی اے کو گرفتار کرلیا

متحدہ قومی موومنٹ پاکستان (ایم کیو ایم ) کی کراچی میں احتجاجی ریلی بلدیاتی قانون کے خلاف نکالی جارہی ہے، ایم پی اے صداقت حسین شیلنگ کے باعث زخمی ہوگئے ہیں، پولیس نے انہیں گرفتار کرلیا ہے۔

 پولیس کی جانب سے وزیر اعلیٰ ہاوس کے باہر مظاہرین پر آنسوگیس کی شیلنگ اور لاٹھی چارج کی گئی، ایم کیو ایم کی ریلی کا ایک حصہ وزیر اعلیٰ ہاؤس پہنچ گیا۔

میٹروپول سگنل پر پولیس نے ایم کیو ایم کارکنوں کو وزیراعلیٰ ہاؤس جانے سے روکنے کی کوشش کی۔

ریلی کی قیادت وسیم اختر اور عامر خان کررہے ہیں، ایم کیو ایم کے کچھ کارکن رکاوٹیں توڑ کر پی آئی ڈی سی چوک پہنچ گئے۔

ایس ایس پی ساؤتھ زبیر نذیر شیخ کارکنوں کو سمجھا بجھا کر واپس بھیج رہے ہیں۔

پی آئی ڈی سی چوک سے وزیراعلیٰ ہاؤس کے درمیان احتجاج کیا جارہا ہے۔

ضیاء الدین احمد روڈ پر وزیراعلیٰ ہاؤس کے گیٹ کو پولیس نے گہرے میں لے لیا، ڈی آئی جی ساؤتھ زون شرجیل کھرل کی سربراہی میں پولیس کی بھاری نفری تعینات ہے۔

پولیس اہلکاروں کی دو لائنیں ہاتھوں میں ہاتھ ڈالے زنجیر بنائے کھڑے ہیں، پولیس نے ایم کیو ایم رہنماؤں اور کارکنوں کو وزیراعلیٰ ہاؤس کے گیٹ کی طرف جانے سے روکا ہوا ہے۔

کراچی میں دو مخلتف ریلیاں نکلنے کے باعث سڑکوں پر ٹریفک جام ہوگیا، جس کی وجہ سے لوگوں کو مشکلات کا سامنا کرنا پڑ رہا ہے۔

کراچی میں شارع فیصل پر شدید دباؤ کی وجہ سے بلوچ کالونی کاز وے پر ٹریفک جام ہوگیا، ڈیفنس کالاپل اور طارق روڈ کے علاقوں میں بھی ٹریفک جام ہے۔

لسبیلہ چوک پر ریلی کی وجہ سے ٹریفک شدید جام ہوگیا ہے، تین ہٹی، پاک کالونی، گارڈن،ناظم آباد اور گرومندر کے اطراف میں ٹریفک جام ہوگیا۔

بشکریہ جنگ