’ابھی بُڈھا نہیں ہوا‘، شاداب کا بابر کو جواب
پاکستان کرکٹ ٹیم کے آل راؤنڈر شاداب خان نے کپتان بابر اعظم کی جانب سے ’بڈھا‘ کہے جانے کا جواب دلچسپ انداز میں دے دیا۔
مائیکرو بلاگنگ ویب سائٹ ٹوئٹر پر وائس کپتان شاداب خان نے بنگلادیش کے خلاف دوسرے ٹی ٹوئنٹی میچ میں شاندار کیچ لینے کی تصویر شیئر کی۔
تصویر میں دیکھا جاسکتا ہے کہ شاداب خان فل ڈائیو کے ساتھ کیچ پکڑ رہے ہیں۔
اپنی یہ تصویر شیئر کرتے ہوئے شاداب خان نے پہلے ٹیم کی تعریف کی اور کہا کہ ایک اور جیت میں ٹیم کی محنت رہی۔
ساتھ میں انہوں نے یہ بھی لکھا کہ ’ایک اور ضروری بات، بڈھا نہیں ہوا میں۔‘ اور کپتان بابر اعظم کو نتھی کیا۔
واضح رہے کہ مینز ٹی ٹوئنٹی ورلڈکپ 2021 کے وارم اپ میچز میں ویسٹ انڈیز کے خلاف ایک موقع پر جب شاداب خان سے رن آؤٹ چھوٹ گیا تو اس پر بابر اعظم نے انہیں ’بڈھا‘ کہا تھا۔
واضح رہے کہ پاکستان نے دوسرے ٹی ٹوئنٹی میں بنگلادیش کو باآسانی 8 وکٹوں سے شکست دے کر تین میچوں کی سیریز میں 0-2 کی ناقابلِ شکست برتری حاصل کرلی۔
ڈھاکا میں کھیلے گئے دوسرے ٹی ٹوئنٹی میچ میں بنگلادیش نے پاکستان کو جیت کے لیے 109 رنز کا ہدف دیا تھا جو شاہینز نے 19ویں اوور میں 2 وکٹوں کے نقصان پر پورا کرلیا تھا۔
Comments are closed.