کورونا کا ڈیلٹا ویرینٹ بچوں کو زیادہ متاثر کر رہا ہے، نوشین حامد

پارلیمانی سیکریٹری صحت نوشین حامد کا کہنا ہے کہ کورونا وائرس کا ڈیلٹا ویرینٹ بچوں کو زیادہ متاثر کر رہا ہے، 12 سال اور زائد عمر کے بچوں کے لیے موجودہ ویکسین محفوظ ہے۔

’جیو نیوز‘ کے پروگرام ’جیو پاکستان‘ میں گفتگو کرتے ہوئے پارلیمانی سیکریٹری صحت نوشین حامد نے کہا کہ 12 سال اور زائد عمر کے بچوں کی اسکولوں کی سطح پر بھی ویکسینیشن کی جائے گی۔

نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 1 ہزار 742 کیسز سامنے آئے ہیں، مزید 39 افراد اس موذی وباء کے سامنے زندگی کی بازی ہار گئے، اس کے مزید 2 ہزار 377 مریض شفایاب ہو گئے، جبکہ مثبت کیسز کی شرح 3 اعشاریہ 30 فیصد ہو گئی۔

نوشین حامد نے یہ بھی بتایا کہ بچوں کو لگائی جانے والی فائزر ویکسین کی کھیپ اس وقت موجود ہے، وقت کے ساتھ ساتھ فائزر کی مزید کھیپ بھی پاکستان منگوائی جائے گی۔

بشکریہ جنگ